Kohëve të fundit në Kosovë ka diskutime të shumta rreth çështjes se a duhet të testohen mësimdhënësit e punësuar apo jo. Vazhdimisht SBASHK-u është shprehur kundër kësaj ideje.
Kryetari i Sindikatës së Bashkuar të Arsimit, Shkencës dhe Kulturës e Republikës së Kosovës (SBASHK), Rrahman Jasharaj, ka bërë të ditur se testimi me shkrim për punëtorët e arsimit është degradues.
Jasharaj si arsye të kundërshtimit ka dhënë se mësimdhënësit kanë marrë diploma.
Ai ka një ide se si do të ishte më mirë të veprohej për këtë rast:
“Ata janë testuar, pyetur dhe kanë marrë diploma dhe dëshmi se janë të përgatitur për sistemin arsimor. Ide më e mirë do të ishte në qoftë se mësimdhënësve do t’u shkohej në orë me inspektorë profesionalë për t’i parë si po punojnë, arritjet por edhe të metat, sepse nuk ka orë ideale. Pastaj inspektori do të këshillonte mësimdhënësit duke i treguar se ku është i shkëlqyeshëm dhe ku ka nevojë të ndërrojë metodën e mësimdhënies. Po të ndodhte kjo, inspektori do të bënte raport dhe për secilin mësimdhënës do të caktonte nevojat e tij/saj për trajnime. Në këtë mënyrë nuk do t’i lodhnim mësimdhënësit me qindra trajnime”, ka deklaruar ai.
Organizata Teach For Kosovo ka kërkuar që të bëhet vlerësimi i përgjithshëm i mësimdhënësve e që numri i tyre në përgjithësi në Kosovë, është 22 mijë mësimdhënës por se vetëm 400 prej tyre janë vlerësuar për performancën e tyre, derisa është theksuar të shqyrtohen edhe licensat që janë dhënë.
