Fëmijët i duan ëmbëlsirat (të paktën një pjesë e madhe e fëmijëve). Është vetëm një ëmbëlsirë që anëtarët më të vegjël dhe më të rinj të asaj grupmoshe këshillohen rreptësisht të mos e konsumojnë kurrë: mjalti.
Organizata Botërore e Shëndetësisë është vetëm një nga shumë grupe mjekësore në mbarë botën që bien dakord që mjalti nuk iu duhet dhënë foshnjave nën 12 muajsh, qoftë i shtuar në formulën e tyre, apo për të qetësuar daljen e dhëmbëve.
Por pse foshnjat nuk duhet të hanë mjaltë?
Problemi me ushqyerjen e foshnjave me mjaltë buron nga mikrobioma e tyre në zhvillim – grupi i mikroorganizmave, si bakteret dhe arkeat, që jetojnë brenda organizmit, që ndihmojnë në rregullimin e dietës dhe ndikojnë në shumë funksione trupore. Përpara se foshnjat të mbushin moshën një vjeç, bakteret në zorrët e tyre nuk janë zhvilluar mjaftueshëm për të ndaluar disa baktere të dëmshme që të infektojnë trupin.
Clostridium botulinum është një bakter potencialisht helmues që përveçse shkakton sëmundjen e njohur si botulizmi i foshnjave, gjendet shpesh në mjaltin e papërpunuar dhe të përpunuar. Sipas një studimi të botuar në 1998, deri në 25% e produkteve të mjaltit janë gjetur se përmbajnë spore të atij bakteri.
Simptomat e botulizmit tek foshnjat mund të jenë të frikshme. Ato përfshijnë një dobësim të muskujve, duke bërë që një fëmijë të duket i çalë dhe i paaftë për të lëvizur krahët ose këmbët, dhe dështim të mundshëm të frymëmarrjes. Megjithatë, nuk ka efekte afatgjata të sëmundjes dhe trajtimet për simptomat kërcënuese për jetën janë të disponueshme shpejt në raste të rënda. Shumica e pacientëve shërohen shpejt pas marrjes së një antitoksine, por mënyra më e mirë për të shmangur infeksionin është të shmangni shkakun numër një: mjaltin.
