Ministrja e Arsimit, Mirela Kumbaro-Furxhi, ka dhënë detaje në lidhje me provimin e shtetit për profesionin e mësuesit dhe licensimin.
Ajo thotë se që prej vitit 2011, ligji për profesionet e rregulluara përcakton se çdo kandidat duhet të kryejë praktikën profesionale dhe të kalojë provimin e shtetit për të marrë licencën përkatëse
Postimi nga minsitrja Kumbaro-Furxhi:
Një sqarim publik në respekt të shumë mësuesve apo kandidatëve për mësues, që gjatë këtyre ditëve kanë kërkuar më tepër informacion në lidhje me provimin e shtetit
për profesionin e mësuesit dhe licensimin.
Është e rëndësishme të theksohet se kjo nuk është një kërkesë e re dhe nuk buron nga vendimmarrje individuale, por nga kuadri ligjor në fuqi.
Që prej vitit 2011, ligji për profesionet e rregulluara përcakton se çdo kandidat duhet të kryejë praktikën profesionale dhe të kalojë provimin e shtetit për të marrë licencën përkatëse.
Ky detyrim është i reflektuar qartë edhe në ligjin për arsimin parauniversitar të vitit 2012, i cili e bën të detyrueshëm këtë proces për ushtrimin e profesionit të mësuesit.
Të gjithë mësuesit në sistemin parauniversitar duhet të kenë përfunduar me sukses praktikën profesionale dhe të kenë kaluar provimin e shtetit për të ushtruar profesionin
Të vetmit që përjashtohen nga ky detyrim janë mësuesit e punësuar para vitit 2011, sepse ligji nuk mund të ketë efekte prapavepruese!
Ndërkohë, aplikimet për provimin e shtetit janë hapur nga data 7 prill dhe do të qëndrojnë të hapura deri më 14 prill.
Të gjithë mësuesve dhe kandidatëve për mësues u uroj shumë suksese dhe i falenderoj nga zemra për përkushtimin dhe punën e jashtëzakonshme çdo ditë!
