Një ditë para se zyrtarisht të fillojë procesi mësimor në Kosovë, edhe më tej vazhdon greva e thirrur nga SBASHK-u.
Megjithatë, jo vetëm greva, por në disa shkolla si ajo “Mihal Grameno” në Fushë Kosovë, sot protestuan nxënësit dhe prindërit.
Kjo për faktin se me vendim të Drejtorisë Komunale të Arsimit të kësaj komune është bërë risistemimi i nxënësve në shkolla të ndryshme.
Kështu, nxënësit e klasës së tetë dhe të nëntë të kësaj shkolle, për shkak të mbingarkesës, është vendosur që të vijojnë mësimin në aneksin e dytë të kësaj shkolle.
Por çështja është se aneksi i dytë i shkollës ndodhet rreth 2 km larg nga shkolla amë dhe nxënësit duhet të kalojnë edhe rrugën kryesore.
I kontaktuar nga RTK në lidhje me këtë protestë, Samir Shahini, drejtor i Drejtorisë së Arsimit në komunën e Fushë Kosovës, deklaron se e gjithë zhvendosja e nxënësve ka të bëjë për shkak të mungesës së hapësirave shkollore.
“Si pasojë e rritjes së numrit të nxënësve në komunën tonë (rikujtojmë që vetëm në vitin shkollor 2022/23 janë hapur 19 paralele të reja në mësim klasor, pra në ciklin 1-5 vetëm në qytet), ne jemi detyruar të shfrytëzojmë çdo hapësirë/klasë të mundshme të lirë në të 3 objektet e shkollës ‘Mihal Grameno’”, thotë Shanini.
Sipas tij, si pasojë, ndërrimi i pasdites në shkollën “Mihal Grameno”, Aneksi 2, ka qenë i lirë (pa nxënës) dhe është marrë vendim pas propozimit të marrë nga një grup punues i themeluar muaj më parë nga DKA, që nxënësit e klasave të 8-ta dhe të 9-ta, nga shkolla amë dhe “Mihal Grameno” Aneksi 2, të kalojnë në shkollën “Mihal Grameno” Aneksi 2, në ndërrimin e pasdites për një vit shkollor, derisa komuna të ndërtojë një objekt të ri shkollor.
“Rikujtojmë tutje që komuna jonë është e hendikepuar në aspektin e pronave komunale, dhe nuk ka mundësi të cilat janë neglizhuar apo nuk janë shfrytëzuar për ndërtimin e shkollave të reja”, thotë ai.
“Vendimi është i prerë dhe nuk ka kthim mbrapa, për faktin se nuk ka një zgjidhje të dytë që akomodon një numër kaq të madh nxënësish në qytet”, shprehet Shahini për RTK-në.
Ai thotë se për më tepër, numri i nxënësve në paralele në rast të anulimit të këtij vendimi shkon në mbi 80 për klasë në paralele të caktuara, e cila bie në kundërshtim me ligjin dhe udhëzimet për sigurim të kushteve adekuate për organizim të procesit mësimor.
