Ministrja Arbërie Nagavci ka marrë pjesë dje në Komisionin kuvendar për Arsim ku u mbajt dëgjim publik lidhur me Projektligjin për Tekste Shkollore, shkruan AlbanianEducation.net.
Ajo thotë se ky projektligj, paraqet legjislacionin thelbësor për sigurimin e cilësisë në arsim në Republikën e Kosovës.
Postimi i saj:
Në Komisionin për Arsim, Shkencë, Teknologji, Inovacion, Kulturё, Rini dhe Sport, u mbajt dëgjim publik lidhur me Projektligjin për Tekste Shkollore.
Si Ministri e Arsimit duke u mbështetur në programin e Qeverisë së Republikës së Kosovës dhe në bashkëpunim me akterët relevantë, në vitin 2022 kemi finalizuar Projektligjin për Tekste Shkollore, i cili është aprovuar në Qeveri dhe ka kaluar në leximin e parë në Kuvend.
Ky projektligj, paraqet legjislacionin thelbësor për sigurimin e cilësisë në arsim në Republikën e Kosovës.
Në procesin e hartimit të këtij projektligji janë përfshirë zyrtarë nga MASHTI dhe institucioneve vartëse të Ministrisë, ekspertë vendorë e ndërkombëtarë, përfshirë këtu edhe Zyren e BE-së në Kosovë, përfaqësues të komunitetit akademik dhe përfaqësues të shoqërisë civile. Janë analizuar e adresuar me kujdes të gjitha komentet e pranuara gjatë konsultimit paraprak e atij publik.
Risitë në këtë Projektligj:
-Aplikimi me dorëshkrime drejtpërdrejt nga Autorët dhe përkrahjen e tyre të vazhdueshme përmes ngritjes së kapaciteteve;
-Sigurimi i recensentëve kompetentë e llogaridhënës që do t’i nënshtrohen programit të ngritjes së kapaciteteve dhe në fund, procesit të certifikimit;
-Pilotimi i teksteve shkollore gjatë përgatitjes teknike që i paraprinë vendimit për botim;
-Rishikimi i vazhdueshëm të teksteve shkollore, të hapur për komente nga të gjithë akterët relevantë dhe përgjatë gjithë vitit;
-Në linjë me qëllimin tonë strategjik të digjitalizimit në arsim, me këtë Projektligj kemi rregulluar edhe mundësitë për ofrimin e teksteve shkollore dhe materialeve mësimore digjitale.
Përveç kësaj, kemi hapur rrugë edhe për mundësitë e përkthimit dhe përshtatjes së teksteve shkollore për të gjitha fushat/lëndët që konsiderohen me interes për t’u përkthyer;
Aprovimi i tij është me interes të veçantë për zhvillimin e sektorit të arsimit parauniversitar në vend dhe zbatimin e Strategjisë së Arsimit 2022-2026.
Falenderoj të gjitha palët për kontributin e dhënë në këtë projektligj dhe ftoj deputetët që të mbështesin dhe miratojnë këtë projektligj i cili është determinues për rritjen e cilësisë së teksteve shkollore.
