Një nismë e veçantë e zhvilluar nga grupi vullnetar “Yjet” në shkollën “Rexhep Akllapi” – Akllap, Lipjan, nën udhëheqjen e lidereve Mimoza Bytyçi dhe Arjeta Shillova Sadiku, është vlerësuar në nivel kombëtar duke fituar vendin e dytë në Çmimin Kombëtar për Projektet Vullnetare.
Projekti kishte për qëllim identifikimin e hershëm të miopisë tek nxënësit dhe rritjen e vetëdijesimit mbi rëndësinë e kujdesit ndaj shikimit.
Kontrolle falas të shikimit dhe mbështetje për nxënësit në nevojë
Falë përkushtimit të grupit “Yjet” dhe udhëheqjes profesionale të Mimoza Bytyçit dhe Arjeta Shillova Sadikut dhe donatorëve të shumtë si qytetarë,prindër ,biznese dhe DKA-ja, në shkollë janë realizuar kontrolle falas të shikimit për një numër të madh nxënësish. Gjatë këtyre kontrolleve janë evidentuar raste me miopi, duke ndihmuar në diagnostikimin e hershëm të problemeve të shikimit.
Nxënësve që kishin nevojë për ndihmë, veçanërisht atyre nga familjet me kushte të vështira ekonomike, u janë siguruar syze korrigjuese falas, duke ndikuar dukshëm në përmirësimin e performancës së tyre mësimore dhe cilësisë së jetës.
Materiale vetëdijesuese të krijuara nga nxënësit
Projekti përfshiu gjithashtu krijimin e një sërë materialesh edukative nga vetë nxënësit:
*Video vetëdijesuese për miopinë,
*Broshura informuese,
*Krijuan këndin e leximit në hapësirat e oborrit të shkollës
*Postera edukativë,
të cilat u shpërndanë në shkollën “Rexhep Akllapi” dhe në shkolla të tjera të komunës së Lipjanit, me qëllim rritjen e vetëdijesimit të nxënësve, prindërve dhe mësimdhënësve për kujdesin ndaj shikimit.
Një shembull frymëzues i vullnetarizmit
Projekti i grupit “Yjet”, i udhëhequr me përkushtim nga Mimoza Bytyçi dhe Arjeta Shillova Sadiku, shërben si një model i shkëlqyer i punës vullnetare dhe angazhimit komunitar. Fitimi i vendit të dytë në garën kombëtare është një dëshmi e vlerës së punës së tyre dhe ndikimit real që projekti ka pasur tek nxënësit dhe komuniteti.
Ky sukses frymëzon shkollat dhe nxënësit në mbarë vendin që të ndërmarrin iniciativa të ngjashme, duke promovuar shëndetin, edukimin dhe vlerat e vullnetarizmit.
