Asamblisti i LDK-së në Kuvendin Komunal të Malishevës, Labinot Gashi, njëherit profesor në shkollën e mesme “Lasgush Poradeci” në Kijevë, ka kritikuar qeverisjen e kryetarit Ekrem Kastrati në sektorin e arsimit.
Gashi tha se gjysma e shkollave në Malishevë nuk kanë drejtor por udhëhiqen nga ushtrues të detyrës.
“Është mandati i dytë që gjysma e shkollave në komunën e Malishevës nuk kanë drejtor të shkollës, kanë ushtrues detyre. Imagjinojeni çka bëhet kur një institucion nuk e ka udhëheqësin përkatës. Mandej janë vonesat në rekrutim dhe në momentin që po flasim kemi orë të pambuluara në arsim. Këto janë probleme dhe shqetësime të sistemit të arsimit”, tha Gashi në debatin “Jeta në Komunë”.
Asamblisti i LDK-së theksoi se ka pasur raste kur një kandidat ka plotësuar kriteret por nuk i është lëshuar vendimi për drejtor.
Kryetari i Malishevës, Ekrem Kastrati, tha se kanë anuluar konkursin për drejtor për shkak të disa “deformimeve procedurale”.
“Ne e kemi pasur një konkurs mirëpo kemi pa gjatë rrugës që konkursi ka pasur deformime procedurale edhe e kemi anuluar konkursin. Tash së shpejti do të kemi një konkurs të ri për drejtorë të shkollave. Ka pasur deformime sepse një kandidat për me i bo argat shokut të vet ka konkurruar në tri shkolla dhe e kemi pa që kjo është një formalitet dhe e kemi anuluar konkursin”- tha Kastrati. / Marrë nga Kallxo.com
