Pediatrja Lira Gjika, ka kritikuar prindërit të cilët i mësojnë fëmijëve të tyre anglisht duke jetuar në Shqipëri, me idene për ta përgatitur fëmijën për një jetë jashtë shtetit.
Përmes një postimi në rrjetet sociale, Gjika, thotë se kjo mënyrë e të mësuarit i bën fëmijët të huaj me veten dhe tregon që prindërit kanë probleme me personalitetin e tyre.
Sipas pediatres kjo gjë ndikon negativisht te fëmijët dhe trurin e tyre.
Postimi i plotë:
Dialogu i dy nënave
-Fëmija im flet vetëm anglisht. E di sa mirë flet, si anglez i vogël. Sa e lumtur që jam. Po shqip flet? Jo mi, e çi duhet shqipja sikur do të rrijë në Shqipëri djali im. Djali im do të iki jashtetit.
Fliste nëna gjithë vendosmëri dhe krenari. Po ti si i flet? Unë? Po anglisht mi i flas. Kam hyrë në kurs edhe unë, që të mësoj anglisht. Ky dialog i zhvilluar në një lokal në Tiranë nuk është i vetëm.
Kjo mënyrë të menduari dhe të sjelluri të nënës dhe jo vetëm të nënës, po edhe të babait, është një gjë e zakonshme sot. Prindër, që i nxisni fëmijët të mësojnë gjuhë të huaja është një gjë shumë e mirë sidomos për trurin e fëmijës, por ti mohoni nga gjuha e vëndit, e origjinës, nga gjuha që jo vetëm prindërit flasin po edhe gjyshërit, është e dëmshme për vetë fëmijën për trurin dhe mëndjen e tij. Kjo mënyrë e bën fëmijën të huaj me veten dhe krijon problem në karakterin e tij.
Jo rastësisht në Amerikë, Angli dhe vënde të tjera, u hapën shkolla për gjuhën e origjinës të emigrantëve pasi minimizon probleme të shëndetit mendor dhe aftësisë për të nxënë apo mësuar të fëmijëve, të cilët janë bijë emigrantësh. Përçmimi i gjuhës së origjinës është problem personaliteti i prindërve që rrisin fëmijët në këtë mënyrë dhe prindërit që kanë problem personaliteti ndikojnë negativisht apo i përcjellin fëmijës problemet e tyre.
