Prindërit e fëmijëve të arsimit parauniversitar kërkojnë zhvillimin e mësimit me orar të plotë 45 minuta.
Nëpërmjet një peticioni ata kanë nisur edhe mbledhjen e firmave në shkollat e kryeqytetit pasi janë edhe institucionet që kanë më shumë ngarkesë. Në shumë shkolla të Tiranës mësimi është me 4 turne dhe orë mësimore 25 minuta.
Kthimi i orëve 45 minuta është një kusht i panegociueshëm për prindërit.
Zhvillimi i mësimit me orar të reduktuar kur pjesa më e madhe e mësuesve janë imunizuar me vaksina anti-covid, për prindërit nuk është e drejte. Sipas autoriteteve rezulton se rreth 88% e arsimtarëve janë vaksinuar me një dozë të vaksinës, prej të cilëve 71% janë më të dyja dozat ndërsa 17 % janë vaksinuar me një dozë. Sipas prindërve peticioni pritet t’i dërgohet Ministrisë së Arsimit fillimin e javës që vjen. Nëse nuk do të marrin përgjigje brenda afatit të përcaktuar ata paralajmërojnë bojkot të mësimit dhe protesta.
