Më 25 gusht ka nisur greva për rritje page e punëtorëve të sektorit publik, me kërkesën e vetme dhënien shtesë nga Qeveria prej 100 eurove, deri në miratimin e Ligjit të Pagave.
Por Qeveria deri më tani nuk ka gjetur një gjuhë të përbashkët me grevistët dhe këta të fundit insistojnë se greva nuk do të ndalet derisa t’iu plotësohen kërkesat e tyre.
Duke parë vendosshmërinë e grevistëve, Ministria e Financave, Punës dhe Transfereve ka nisur kërcënimin ndaj tyre duke kërkuar listën e nëpunësve grevistë, në mënyrë që të njëjtit të penalizohen në rroga.
Por çfarë thotë Ligji për greva i cili ishte miratuar në vitin 2010, e më pas ishte plotësuar sërish me disa detaje të tjera.
Neni 13 i këtij ligji kur flet për mbrojtjen e të drejtave të punësuarve gjatë grevës thotë:
“Për organizuesit e grevës, pjesëmarrësve grevistë dhe ndaj të punësuarve të tjerë, të cilët mbështesin grevën, nuk mund të merren masa disiplinore apo materiale dhe nuk mund t’ju ndërpritet marrëdhënia e punës”, thuhet në paragrafin e parë të këtij neni.
Paragrafi tjetër specifikon se gjatë kohës së grevës punëdhënësit nuk mund t’i zëvendësojnë pjësëmarrësit në grevë me punëtorë të ri.
Dykuptimësia e këtij ligji, vjen si rezultat i një plotësim/ndryshimi të tij, i cili mban datën 6 shtator 2012. Me këtë plotësim/ndryshim, ndryshohet neni 18.
Neni 18: Tre paragrafë janë paraparë në mënyrë që të rregullohet ligjshmëria e grevës: Gjatë zhvillimit të grevës pezullohen detyrimet që rrjedhin nga Kontrata e Punës, Ndërprerja ose largimi nga marëdhënia e punës për shkak të pjesëmarrjes në një grevë të ligjshme është i kundërligjshëm, paragrafi i dytë nuk zbatohet kur i punësuari gjatë grevës kryen një akt që bie ndesh me ligjin.
