Prej shtatorit të vitit shkollor 2022/23 do të rikthehet vlerësimi i nxënësit në arsimin parauniversitar në dy periudha, siç ka qenë para vitit 2016.
Ministria e Arsimit, Shkencës, Teknologjisë dhe Inovacionit parasheh që me udhëzimin e ri administrativ vlerësimi të bëhet në gjysmëvjetorin e parë dhe gjysmëvjetori e dytë, duke e hequr vlerësimin që ishte i përcaktuar deri më tani me UA të vitit 2016, ku përfshihej vlerësimi para pushimit pranveror.
Në raportin e Zyrës Kombëtare të Auditimit “Vlerësimi i nxënësve në testet kombëtare dhe ndërkombëtare” është theksuar mospërputhja e vlerësimit të nxënësve me rezultate në testet kombëtare dhe ndërkombëtare.
“Për shembull, pesë nxënës me notë mesatare 5 shënuan vetëm 20 deri në 40 pikë në Testin e Arritshmërisë. Edhe e kundërta është gjithashtu e vërtetë, p.sh. një nxënës kishte notën mesatare nën 2, por megjithatë arriti të shënonte mbi 70 pikë në TA. Nëse lidhja mes notave mesatare dhe rezultateve të testit do të ishte më e fortë, pikat do të ishin më afër vijave të tyre përkatëse”, shkruhet në raportin e performancës.
