Atmosfera e përvjetorit të pavarësisë ishte më e zbehtë në pjesën veriore të Kosovës.
Nxënësit dhe mësuesit e shkollave shqipe iu bashkuan festës përmes këngëve e poezive patriotike.
Mirëpo ata nuk po ndjehen të sigurt ta festojnë pavarësinë e Kosovës as pas 15 vjetëve në pjesën ku shumicë janë serbët.
Dashuria për Kosovën shihet në sytë e tyre. Edhe pse më zbehtë sesa në pjesën tjetër andej Ibrit, përvjetori i Kosovës shtet, po festohet edhe këtu, në veri.
17 shkurti sjell aromë feste edhe këtu në shkollën shqipe në Bistricë, rrëzë maleve të bukura të Leposaviqit.
Ndonëse në kushte jo të mira, ata mundohen që sadopak përvjetorin e pavarësisë ta shënojnë me një festë të dinjitetshme, thotë Rudina Salihu, drejtoreshë e shkollës.
Nxënësve të Bistricës, Kushtovës e Cerajës, nuk ju mungon as vullneti për të recituar vargje.
Madje ditë të tilla si kjo e 17 shkurtit, mësuesja thotë se fëmijët i presin me padurim, u shpreh Semra Rexha, mësuese.
Përveç në këtë shkollë, festa e pavarësisë u shënua edhe në shkollën “Azis Sylejmani” në Mitrovicën Veriore.
Dëshira për të festuar nuk mungon as këtu, por kushtet po, shprehet Ardiana Avdiu, mësuese.
“Përpos kushteve që përkojnë me Kosovën e paraluftës, as situata e sigurisë nuk është në gjendjen më të mirë.
E për këtë shkak, flamuri shtetëror, nuk u vendos as në përvjetorin e pavarësisë”, tha ajo.
Në këtë shkollë në Kodrën e Minatorëve vijojnë mësimin nxënësit nga klasa e parë deri në klasën e nëntë. /Tëvë1/
