Është përuruar sot objekti i shkollës “Zenel Hajdini” në Terstenik të Drenasit, ambientet e të cilës janë rinovuar tërësisht duke krijuar kushte më të mira për mësim dhe argëtim për më të vegjlit.
Përveç ministres Arbërie Nagavci ka marrë pjesë edhe ambasadori i Amerikës, Jeffrey Hovenier, shkruan AlbanianEducation.net.
Postimi i ministres:
Bashkë me Ambasadorin e Amerikës z. Jeffrey Hovenier përuruam sot objektin e shkollës “Zenel Hajdini” në Terstenik të Drenasit, ambientet e të cilës janë rinovuar tërësisht duke krijuar kushte më të mira për mësim dhe argëtim për më të vegjlit tanë.
Falë mbështetjes nga Komanda Ushtarake e Shteteve të Bashkuara të Amerikës (EUCOM), përmes programit për Ndihmë Humanitare dhe Zyrës për Bashkëpunim në Mbrojtje në
Ambasadën e SHBA-së në Prishtinë, kjo shkollë tani ka kulm, mure, dyer e dritare të reja.
Vlera totale e këtij projekti arrin shumën prej 500.000$.
Më shumë se 270 nxënës të Drenasit nga sot do të zhvillojnë mësimin në kushte më të mira. Kemi adresuar prioritetet e shkollës dhe nevojat e nxënësve e mësimdhënësve të shkollës.
Ministria e Arsimit një nga prioritetet e saj ka krijimin e kushteve më të mira dhe më cilësore për fëmijët tanë, ku në fokus të veçantë e kemi vënë infrastrukturën shkollore.
Përveçse po ndërtojmë shkolla e çerdhe të reja, po vazhdon puna për ristrukturimin e objekteve të vjetra dhe adaptimin e tyre në ambiente moderne dhe efikase për zhvillim edukativo-arsimor të fëmijëve.
Përjetësisht falenderuese për gjithë ndihmën dhe mbështetjen e pa rezervë të Shteteve të Bashkuara të Amerikës, përkrahës të vazhdueshëm e partner kyç i shtetit tonë.
Mirënjohje për punën e palodhur të mësimdhënësve dhe stafit të shkollës.
Ju faleminderit për mikpritjen e përzemërt sot në shkollën tuaj!
E gëzofshi shkollën e shumë suksese të reja!
