Gjatë ditës së djeshme, është bërë përurimi i objektit të ri e modern të shkollës “Sadedin Hajda” në Rahovec.
Kryetari i komunës, Smajl Latifi, është shprehur i lumtur që ndërtimi i këtij objekti shkollor në Rahovec, është finalizuar.
Objekti i ri, që u përurua dje përmbush standardet e larta bashkëkohore dhe mundëson që mësimdhënia në këtë shkollë të ofrohet në kushtet e kërkuara.
“Në prani të nxënësve, mësimdhënësve, prindërve, familjarëve të dëshmorëve, drejtorit të DKA-së, bashkëpunëtorëve të mi dhe shumë qytetarëve, u bë përurimi i objektit të ri të Shfmu “Sadedin Hajda” në Rahovec. Ndërtimi i objektit të kësaj shkolle dhe sallës së edukatës fizike, ishte projekt i investuar nga ish Ministria e Administratës Publike, që tash quhet Ministria e Punëve të Brendshme. Ndonëse projekt i vonuar në kohë, sepse punimet kishin nisur në vitin 2017, ne jemi të lumtur që më në fund u finalizua. Nxënësit dhe mësimdhënësit e shkollës “Sadedin Hajda” deri më sot mbanin mësim në Shkollën e Mesme Profesionale, në ndërrimin e pasdites, ku edhe nuk e kishin as kohën e as hapësirën e mjaftueshme për të zhvilluar normalisht procesin edukativo-arsimor. Objekti i ri, që u përurua sot dhe salla e edukatës fizike janë të standardeve më të larta bashkëkohore dhe mundëson që nxënësve dhe mësimdhënësve të kësaj shkolle t’u ofrohen kushte shumë të mira”, ka shkruar Kryetari i Rahovecit.
Latifi ka thënë se objekti i ri i shkollës në vete përmban 3 klasa për edukimin parafillor, të gjitha klasat për klasat e Shfmu-së, sallë leximi, bibliotekë, sallën e kabinetit të teknologjisë informative, sallën për pajisje laboratorike, ashensor dhe të gjitha hapësirat e nevojshme për mbajtjen, zhvillimin dhe avancimin e procesit edukativo- arsimor në nivelet më të larta të cilësisë.
“Urime dhe ta gëzoni shkollën e re, të dashur nxënës, mësimdhënës e prindër!”, ka shkruar në fund ai.
