Nëse ke një kosh plot me lodra të dëmtuara në shtëpi, makina pa një rrotë, apo kukulla pa një këmbë, mos i hidh.
Mos i gjej as ndonjë cep shtëpie që t`i harrosh ku i ke lënë. Përkundrazi. Ato duhet t`ia japësh fëmijës që të luajë.
I ndihmon të zhvillojnë imagjinatën, ashtu siç nuk mund ta imagjinoni. Këshilla vjen nga Lira Gjika, pediatria që nuk i kursen as në rrjete sociale.
“Lodrat e vjetra apo të prishura janë shumë të vlefshme. Ato i nxitin fëmijës fantazinë si mund ta rregullojnë apo t`i japin një formë tjetër. Ndërsa kur janë bicikleta, patina apo makina fëmijët i përdorin me më shumë vështirësi dhe kështu ndihmon në përqëndrimin për të ruajtur ekuilibrin që të mos rëzohet. Prindër nxitini fëmijët të vazhdojnë ti përdorin lodrat e prishura. Mund t`i rregulloni sëbashku dhe kështu kaloni kohë dhe bashkëpunoni. Ju bën mirë të dy palëve. Ju çlodheni në mënyrë aktive që është mënyrë shumë e shëndetshme për t`u qetësuar dhe fëmija mëson e dialogon me ju që është një proces i domosdoshëm për të. Gjithashtu i mësoni fëmijës se lodrat janë blerë edhe kur janë dhuratë dhe lekët i kemi nëpërmjet punës prandaj duhet ti ruajmë e mos ti shpërdorojmë. Ja dhe një mënyrë efikase për ti mësuar vlerën e punës dhe te lekut. Po edhe kur fëmija nuk i do më lodrat, ju duhet ti regulloni sëbashku me fëmijën dhe ti dhuroni. Ti a dhuroni një fëmije tjetër ose një qëndre që grumbullon lodra dhe i çon në institucione apo familje që nuk mund të blejnë lodra për fëmijët e tyre. Në këtë mënyrë zhvilloni te fëmija empatinë dhe dhembshurinë”, shkruan Lira Gjika.
