Dy javë me parë, pati zënkë Ortodonti për numrin e orëve të shpërndara brenda katedrës. Debati devijoi në akuza e kundërakuza mes dy asistentëve të kësaj katedre dhe shefes së saj, Albena Reshitaj, që në të njëjtën kohë është edhe deputete.
Për këtë përplasje, Fakulteti i Mjekësisë ka paralajmëruar inicim të masave disiplinore për dy asistentët që i ka denoncuar Reshitaj.
Në hetuesi, si të dyshuar për kërcënim javë më parë patën përfunduar dy asistentët Sokol Krasniqi e Blerim Mehmeti, që u intervistuan dhe u lanë të lirë.
Krasniqi mohon ta ketë kërcënuar Reshitajn.
“Unë kam kërkuar të drejtën tonë, duke u bazuar në konkursin e fundit, kam kërkuar nga deputetja që është edhe shefe e katedrës se pse nuk është bërë avancimi për mua dhe kolegun tjetër përderisa orë ka dhe qëllimshëm behët fshehja e orëve për të mos dalë pozitat për avancim”, ka thënë Krasniqi.
Kjo kërkesë, sipas Krasniqit, ka bërë që diskutimi të eskalojë. Tha se ka braktisur mbledhjen e pas disa minutash, e ka parë Policinë në vendin e tij të punës.
Sipas tij, Reshitaj ka thënë se ai e ka kërcënuar dy herë, e në Polici njëri kërcënim i pretenduar lidhet me diskutimet publike për emërimin e kryeprokurorit të shtetit. Ai e rrëfeu atë se çfarë i ka thënë një polic aty.
“A është e vërtetë se ju keni ndikim në politikë dhe a është e vërtetë se ju keni thirrë dikë dhe e keni kërcënuar për çështjen e kryeprokurorit. Këtu ka qenë kulminacioni i shqetësimit tim, sepse e kam pa që është duke m’u skenu një ngjarje me qëllim edhe pse e dinte që unë nuk jam”, ka shtuar ai.
Krasniqi ka thënë që ata janë lënë të lirë dhe sipas tij, hetuesia e ka mbyllur rastin. E shtoi se veçse ka bërë padi për shpifje kundër Reshitajt, si dhe ankesë në Fakultetin e Mjekësisë.
Në Polici nuk kanë kthyer përgjigje për atë nëse janë mbyllur ose jo këto hetime. Përgjigje nuk ka kthyer as deputetja Reshitaj.
E Fakulteti i Mjekësisë përmes një përgjigjeje me shkrim, i ka dalë në krah deputetes.
Ka paralajmëruar masa ndaj dy asistentëve.
“Menaxhmenti i FM , pas pranimit të deklaratës së Prof. asoc. dr. Albena Reshitaj – Shefe e Katedrës , me nr. protokolli 9654 të datës 20.10.2023 , ka dërguar kërkesë për pezullim, suspendim sipas ligjit për shkelje të supozuar disiplinore për të dy asistentët, për Rektorin e UPHP profesor dr. Qerim Qerimi me nr. protokolli 01, 4/68 të datës 25.10.2023, si dhe fletëparaqitje për shkelje të supozuar disiplinore dhe denoncimin e shkeljes së bërë nga dy asistentët, lidhur me kërcënimin, frikësimin, gjuhën denigruese dhe ofenduese ndaj Shefit të Katedrës Prof. asoc. dr. Albena Reshitaj, në Këshillin e Etikës në UP, me nr. protokolli 01, 4/69 të datës25.10.2023”, thuhet në përgjigje.
Asistenti Krasniqi pretendon se Reshitaj për shkak që mban postin e deputetes nuk ka të drejtë që të mbajë edhe pozitën e shefes së katedrës. Në Fakultetin e Mjekësisë kanë deklaruar se deputeti nuk mund të zgjidhet në pozita të tjera, por përjashtim bënë puna akademike.
“Lidhur me këtë nuk ka pasur pengesë ligjore për ushtrimin e funksionit të shefit të Katedrës, sepse në këtë pozitë të njëjtit nuk kompensohen”, thuhet tutje në përgjigjen e Fakultetit të Mjekësisë.
Kjo nuk është hera e parë që në Fakultetin e Mjekësisë ka ankesa për avancimet e asistentëve. Në fillimin e këtij viti, asistentë të Fakultetit të Mjekësisë, përmes protestës kanë kërkuar që rregullorja, që përcakton numrin e studentëve për grupe në disa drejtime, të fillojë të zbatohet, gjë që do të nënkuptonte edhe avancimin e tyre.
