Përjashtimi i një nxënëseje nga shkolla fillore e mesme e ulët “Asdreni “ në Pejë, vetëm për shkak të mbulesës, ka nxitur reagime të shumta.
Ky vendim u përcoll edhe me protestë të nxënësve, teksa vajza pas disa ditësh është rikthyer në shkollë. Objekt i kritikave të shumta, që eskaluan në kanosje, ka qenë drejtoresha e shkollës, e cila i ka denoncuar këto raste në Polici, raporton Gazeta Sinjali.
Siç mëson Sinjali, Agime Lajqi, e cila mban pozitën e drejtorit në këtë shkollë, ka kërkuar ndihmën e Policisë, me ç’rast i ka raportuar disa raste të kanosjeve serioze ndaj saj, nëpër rrjete sociale.
Burimet brenda Prokurorisë kanë bërë me dije se me rastin e denoncimit të rastit, drejtoresha ka deponuar edhe dëshmi lidhur me kërcënimet që ka marrë prej kur nxënësja me shami u ndalua të vijonte mësimin në këtë shkollë.
Pas dhënies së deklaratës së saj para hetuesve policorë, Prokurori i Shtetit ka urdhëruar inicimin e rastit dhe ndërmarrjen e veprimeve të nevojshme për të siguruar prezencën e personave të dyshuar.
Gazeta Sinjali ka kontaktuar edhe drejtoreshën për të marrë një deklaratë lidhur me rastin, por e njëjta akoma nuk ka kthyer përgjigjur.
