Është pensionuar profesori Skender Hasani nga Gjilani. Njoftimin e ka dhënë shkolla “Zenel Hajdini”, në të cilën profesor Skenderi ka punuar më shumë se 30 vite, shkruan AlbanianEducation.net.
Njoftimi i shkollës:
Sot, Prof. Skënder Hasani përfundoi karrierën e tij si mësimdhënës pas më shumë se 30 viteve pune të përkushtuar në shkollën tonë.
Gjatë gjithë këtyre viteve, ai ka qenë një mësues i përkushtuar, shembull i disiplinës dhe i dashurisë për dijen, duke lënë gjurmë të pashlyeshme në edukimin dhe formimin e gjeneratave të nxënësve.
Me përvojën, përkushtimin dhe profesionalizmin e tij, Prof. Hasani ka dhënë një kontribut të jashtëzakonshëm në zhvillimin e shkollës sonë dhe do të kujtohet gjithmonë me respekt e mirënjohje nga të gjithë ne.
Drejtoria e shkollës, së bashku me mësimdhënësit dhe stafin, i urojnë profesor Skënderit shëndet, qetësi dhe shumë gëzime në pensionin e merituar.
Fjalimi i drejtorit Jeton Rexhepi
Të nderuar kolegë!
Familjarë e miq të profesorit Skënder!
Ndjehem shumë i nderuar që sot, në cilësinë e drejtorit të Gjimnazit, t’i urojë ditëlindjen profesorit tim, kolegut e mikut tonë, profesor Skenderit.
Ndjehem i privilegjuar që isha nxënës i tij, koleg e mik, dhe vlerësoj faktin se kurdo ishte i njëjti; i afërt e plot energji, i gatshëm për të ndihmuar e për të qenë krah kujtdo kur i kërkohej. Gjithmonë serioz e i drejtë; në krye të çfarëdo organizimi; gjithmonë dinjitoz, i drejtpërdrejtë e i pakompromis.
Ta mbyllësh punën në arsim duke ruajtur dinjitetin e mësuesit dhe duke qenë gjithmonë i vlerësuar e i dashur nga nxënësit, kolegët e drejtuesit – pak prej nesh ia dalin. Profesor Skënder Hasani ia doli të bëhet modeli se si duhet qëndruar vertikalisht në gjithë rrugëtimin e shkollës shqipe nëpër sfida e suksese. Ai ia doli të jetë modeli për të gjithë ne që u rritëm e punuam krah tij.
Profesor Skënder!
Të faleminderit që ishe pjesa më e mirë e jona – i tillë do të vazhdosh të mbetesh!
Të faleminderit që ishe krahu i djathtë i secilit prej nesh, që ishe profesori ynë, që ishe miku ynë. I tillë do të mbetesh për të gjithë ne.
Lutemi që të të prijë shëndeti e gëzimet në familje!
Shpresojmë ta ndjekim rrugën që na e ke mësuar, ashtu siç na e ke mësuar.
Të lumtur e të privilegjuar që të kishim e që të kemi!
Gëzuar ditëlindjen profesor, sepse pensionimi të ndan nga brezat e ardhshëm të nxënësve, por kurrë nga brezat e shkuar e nga të gjithë ne!
Faleminderit që na lejove të jemi pjesë në jetën tënde.
Qofsh i lumtur e shëndetplotë!
Gëzuar profesor Skënder Hasani!
Drejtori,
Jeton Rexhepi – nxënës e mik i përjetshëm i joti
