Pas dekadash të tëra të përkushtimit në arsim dhe art, profesori dhe piktori i njohur Luan Shahiqi ka përmbyllur karrierën e tij profesionale si mësimdhënës, duke u pensionuar mes vlerësimeve dhe emocioneve të kolegëve, miqve dhe familjarëve.
Në ceremoninë e organizuar me këtë rast, drejtori i Shkollës së Arteve Pamore “Adem Kastrati”, Roland Masurica, vlerësoi lart kontributin e profesor Shahiqit, duke theksuar përkushtimin, profesionalizmin dhe korrektësinë që e kanë shoqëruar gjatë gjithë veprimtarisë së tij.
“Profesori Luan Shahiqi po mbyll një kapitull të rëndësishëm të jetës profesionale, duke lënë pas një trashëgimi të çmuar në arsim dhe art. Për ne, ai mbetet shembull i përkushtimit dhe i dashurisë për profesionin”, tha Masurica.
Ai veçoi gjithashtu krijimtarinë artistike të Shahiqit, e cila është prezantuar në dhjetëra ekspozita brenda dhe jashtë vendit, duke e bërë atë një nga emrat më të respektuar të artit pamor në Gjilan dhe më gjerë.
Me fjalë mirënjohjeje u paraqitën edhe kolegët Nijazi Haziri, Rexhep Bunjaku, Agim Kajtazi dhe Bajram Fejzullahu, të cilët vlerësuan jo vetëm punën e tij si pedagog, por edhe cilësitë njerëzore që e kanë karakterizuar ndër vite.
Në emër të familjes foli Kujtim Shahiqi, i cili falënderoi kolektivin e shkollës për respektin dhe vlerësimin e treguar ndaj profesorit.
I emocionuar, profesori Luan Shahiqi u shpreh mirënjohës për nderimin që iu bë në ditën e pensionimit.
“Ka ardhur koha për të pushuar nga puna e përditshme, por jo edhe nga arti. Për sa kohë do ta kem shëndetin, do të vazhdoj të krijoj, sepse në art nuk ka pensionim”, tha ai.
Në shenjë mirënjohjeje për kontributin e dhënë në edukimin e shumë gjeneratave dhe në zhvillimin e artit pamor, profesorit Shahiqi iu ndanë mirënjohje nga drejtoria e shkollës dhe Drejtoria Komunale e Arsimit në Gjilan.
Një jetë në shërbim të artit dhe arsimit
Luan Shahiqi u lind më 19 korrik 1961 në Gjilan. Studimet i kreu në Akademinë e Arteve, në degën e Pikturës, ku më vonë fitoi edhe gradën Magjistër i Arteve.
Karrierën profesionale e nisi në vitin 1983 si dizajner në fabrikën e tekstilit “INTEGJ” në Gjilan, ndërsa më pas për më shumë se dy dekada ushtroi profesionin e dizajnerit të enterierit. Në vitin 2012 iu bashkua Shkollës së Arteve Pamore “Adem Kastrati”, ku kontribuoi në edukimin dhe formimin artistik të shumë brezave të rinj.
