Profesori Ibrahim Berisha mbajti sot ligjëratën përshëndetëse nën organizimin e Kuvendit të Sociologjisë, me rastin e pensionimit dhe përfundimit të angazhimit të tij në Universitetin e Prishtinës.
Para një audience të përbërë nga miq, bashkëpunëtorë, kolegë dhe studentë, profesori ndau kujtime, përjetime dhe reflektime nga rrugëtimi i tij shumëvjeçar akademik e intelektual.
Në emër të Fakultetit Filozofik, dekani Baliqi ndau një mirënjohje për kontributin e çmuar të profesorit Berisha, ndërsa edhe studentët e Departamentit të Sociologjisë i dhuruan një mirënjohje simbolike në shenjë falënderimi. Për figurën dhe veprën e tij folën gjithashtu bashkëpunëtorë dhe kolegë të afërt.
Departamenti i Sociologjisë falënderon Profesorin Ibrahim Berisha për angazhimin dhe përkushtimin e tij ndaj studentëve dhe dijes në përgjithësi.
Profesor Berisha është në mesin e emblemave më të rëndësishme të kulturës dhe shkencës në Kosovë. Departamenti i Sociologjisë do të jetë përherë krenar me emrin e tij.
