Pas më shumë se 30 vitesh përkushtim në edukimin dhe formimin artistik të brezave të rinj, profesoresha e muzikës Violeta Kurhasani ka përmbyllur rrugëtimin e saj profesional në Qendrën Burimore për Mësim dhe Këshillim (QBMK) “Xheladin Deda” në Pejë.
Lajmi është bërë i ditur nga institucioni, i cili ka shprehur mirënjohje dhe respekt të veçantë për kontributin e saj të çmuar në arsim dhe muzikë.
Që nga viti 1994, Kurhasani ishte pjesë e pandashme e QBMK “Xheladin Deda”, ku me përkushtim dhe profesionalizëm ka ndihmuar në zbulimin, zhvillimin dhe avancimin e talenteve të shumta në fushën e muzikës. Gjatë karrierës së saj, ajo ka edukuar gjenerata të tëra nxënësish, shumë prej të cilëve më vonë kanë vazhduar studimet universitare në drejtimin e muzikës dhe janë shndërruar në profesionistë të suksesshëm të kësaj fushe.
Kontributi i saj shumëvjeçar është vlerësuar edhe nga institucionet arsimore, duke u nderuar me mirënjohje zyrtare nga Ministria e Arsimit, Shkencës, Teknologjisë dhe Inovacionit.
Më 15 qershor 2026, profesoresha Kurhasani përfundoi zyrtarisht angazhimin e saj profesional, ndërsa një ditë më vonë u përcoll me nderime nga kolegët e saj, të cilët vlerësuan lart punën, përkushtimin dhe ndikimin e saj në jetën e shumë nxënësve.
Veç kontributit në mësimdhënie, ajo u kujdes edhe për bartjen e përvojës profesionale tek kolegët e rinj, duke ndarë metodologjinë e saj të punës dhe duke ndihmuar në ruajtjen e traditës së ndërtuar ndër vite në këtë institucion.
Pensionimi i profesoreshës Violeta Kurhasani shënon fundin e një kapitulli të rëndësishëm për QBMK “Xheladin Deda”, por trashëgimia e saj në edukimin muzikor do të vazhdojë të jetojë përmes brezave që ajo ka formuar.
