Është pensionuar profesori i matematikës, Mehdi Krasniqi, i cili për më shumë se katër dekada i ka shërbyer arsimit dhe formimit të brezave të rinj në Gjimnazin “Hamdi Berisha” në Malishevë, shkruan AlbanianEducation.net.
Prof. Krasniqi njihet si një mësimdhënës i përkushtuar, korrekt dhe i palodhur, i cili përveç njohurive profesionale, nxënësve u ka përcjellë vlera jetësore si disiplina, këmbëngulja dhe dashuria për dijen.
Përmes mësimit të matematikës, ai ka ndikuar drejtpërdrejt në zhvillimin intelektual dhe personal të shumë gjeneratave.
Një kontribut i veçantë i tij lidhet me periudhën para luftës, kur arsimi në Kosovë përballej me kushte të rënda dhe mungesë të theksuar të mbështetjes institucionale.
Edhe në ato rrethana të vështira, prof. Krasniqi vazhdoi misionin e tij arsimor me përkushtim dhe qëndrueshmëri, duke e konsideruar dijen si formë rezistence dhe shkollën si bazë të lirisë.
Gjatë mbi 40 viteve punë, ai ka lënë gjurmë të thella në jetën profesionale dhe njerëzore të nxënësve të tij, shumë prej të cilëve sot janë pjesë aktive dhe të suksesshme e shoqërisë.
Pensionimi i prof. Mehdi Krasniqit përfaqëson përmbylljen me dinjitet të një rruge të ndërtuar mbi përkushtim dhe vlera, ndërsa trashëgimia e tij do të vazhdojë të jetojë përmes dijes dhe respektit të atyre që patën fatin ta kenë mësues.
