Është pensionuar mësuesja Haxhere Gërguri-Berisha, nga shkolla “Zejnel Salihu” në Bardh të Madh, shkruan AlbanianEducation.net.
Njoftimin e ka dhënë Drejtoria Komunale e Arsimit.
Njoftimi:
Sot shënojmë një moment të veçantë, pensionimin e mësueses së përkushtuar, znj. Haxhere Gërguri-Berisha, nga ShFMU “Zejnel Salihu” në Bardh të Madh. Pas dekadash të tëra të shërbimit të saj të palodhur në edukimin e gjeneratave të reja, znj. Berisha lë pas një trashëgimi të pasur të dijes, dashurisë për arsimin dhe përkushtimit të saj ndaj komunitetit.
Në emër të Drejtorisë Komunale të Arsimit, dhe të drejtorit z. Fatlum Berisha, shprehim mirënjohjen tonë të thellë për kontributin e saj të jashtëzakonshëm. Z. Berisha pati kënaqësinë ta presë znj. Berisha në një takim, ku u vlerësua roli i saj si edukatore dhe mentore për shumë gjenerata të nxënësve që sot kontribuojnë në shoqëri.
Znj. Haxhere Berisha nuk ishte vetëm një mësuese; ajo ishte një burim frymëzimi, një udhërrëfyese e fëmijëve dhe një shembull për të gjithë kolegët e saj. Ndikimi i saj në jetën e nxënësve dhe komunitetit mbetet i pashlyeshëm dhe do të kujtohet gjithmonë me respekt dhe dashuri.
I urojmë mësueses Haxhere një pensionim të qetë dhe të lumtur, me urimet më të mira për shëndet dhe gëzim në këtë kapitull të ri të jetës së saj!
