Shkolla “Bajram Curri” në Sllatinë e Madhe të Fushë Kosovës ka njoftuar se është pensionuar arsimtarja e Biologjisë, Bjeshkë Gjonbalaj Rugova, shkruan AlbanianEducation.net.
Shkolla thotë se mësuesja Bjeshkë ka qenë gjithmonë shembull i disiplinës, i përgatitjes profesionale dhe i dashurisë për profesionin fisnik të mësimdhënies.
Njoftimi i plotë:
Sot del në pension arsimtarja e Biologjisë, znj. Bjeshkë Gjonbalaj Rugova .
Sot është një ditë e veçantë për shkollën tonë dhe për gjithë komunitetin arsimor, sepse festojmë jo vetëm ditëlindjen, por edhe pensionimin e mësueses sonë të dashur të Biologjisë, znj. Bjeshkë Rugova, e cila për gati tri dekada ka dhënë një kontribut të madh në shkollën tonë.
Mësuesja Bjeshkë ka qenë gjithmonë shembull i disiplinës, i përgatitjes profesionale dhe i dashurisë për profesionin fisnik të mësimdhënies. Ajo ka gëzuar gjithmonë respekt të veçantë nga nxënësit, ish-nxënësit dhe kolegët, duke u bërë model frymëzimi për breza të tërë që kaluan nëpër bankat e shkollës sonë.
Në rrugëtimin e saj të gjatë arsimor ka përballuar shumë sfida, por gjithmonë me përkushtim, seriozitet dhe dashuri për punën. Pas saj mbeten gjurmë të forta: gjenerata e gjenerata nxënësish me të cilët sot krenohemi, jo vetëm për dijen e marrë, por edhe për vlerat njerëzore që ajo u përcolli dhe që do të jetojnë gjatë në kujtimet e tyre dhe tonat.
Në këtë ditë të shënuar, i urojmë jetë të gjatë, shëndet dhe gëzime të pafundme në këtë etapë të re të jetës.
Mësuese e dashur, urime ditëlindjen dhe pensionimin e merituar! 🌸
Faleminderit për gjithçka që keni dhënë me aq shumë dashuri e përkushtim! 🤍
