Në një kohë kur arsimi kërkon më shumë se dije – kërkon ndërgjegjësim, guxim dhe angazhim – në Gjimnazin “Hamdi Berisha” në Malishevë po veçohet një emër që po sjell ndryshim të vërtetë: Mirushe Krasniqi-Buzhala.
Si pedagoge, ajo nuk e sheh shkollën vetëm si vend mësimi, por si një hapësirë ku ndërtohen vlera, formohet karakteri dhe lindin iniciativa që prekin gjithë komunitetin.
Një ndër angazhimet e saj më të fuqishme janë aktivitetet për parandalimin e dhunës ndaj grave, ku përmes sensibilizimit dhe reflektimit, nxënësit ballafaqohen me realitete të dhimbshme që shumë gra i përjetojnë çdo ditë. Mesazhi është i qartë: heshtja nuk është zgjidhje.
Kulmi i këtij angazhimi ishte aktiviteti “Heshtja Vret”, i realizuar përmes një seance gjyqësore të improvizuar, në bashkëpunim me Universitetin AAB. Në këtë përvojë unike, nxënësit kuptuan se jo vetëm fajtori, por edhe heshtja mund të jetë bashkëfajtore.
Ajo ka sjellë risi edhe përmes organizimit, për herë të parë, të “Tryezës Mike”, duke bashkuar gra nga profesione të ndryshme për të ndarë histori jete dhe për të fuqizuar të rinjtë.
Në frymën e humanizmit, ajo ka organizuar aktivitete si punimi dhe shitja e kartolinave me çmim simbolik, si dhe projektin “Një lodër për një buzëqeshje”, ku nxënësit krijojnë vetë lodra për t’ua dhuruar fëmijëve – duke përhapur gëzim dhe empati.
Një tjetër dimension i rëndësishëm është aktiviteti i riciklimit, përmes të cilit janë realizuar ligjërata, fushata dhe iniciativa kreative, ndërsa pritet edhe një befasi e madhe që dëshmon se këto projekte kanë vazhdimësi dhe ndikim.
Në aspektin kulturor, ajo ka organizuar shfaqje artistike në Shtëpinë e Kulturës, në bashkëpunim me Universitetin AAB dhe aktorë të njohur nga Kosova. Një nga këto shfaqje pritet të mbahet më 24.03.2026.
© AlbanianEducation.net – Të gjitha të drejtat e rezervuara
