17 shkurt 2008 është data kur Kosova e shpalli Pavarësinë. Por kjo datë nuk është përfshirë në asnjë nga katër alternativat me të cilat sfidohen nxënësit e klasës së katërt në pyetjen se kur është shpallur Pavarësia.
17 shkurt 2006, 17 shtator 2008, 17 shtator 2009 apo 17 shkurt 2007 janë opsionet që u ofrohen nxënësve në fletore-punën e lëndës “Shoqëria dhe Mjedisi 4” edhe pse data është dhënë e saktë në librin bazë, raporton KOHA.
Prindërit e nxënësve kanë reaguar në rrjete sociale për gabimin e vënë re. Ata kanë treguar se nxënësit janë detyruar që ta ndryshojnë njërin nga opsionet për të nxjerrë rezultatin e saktë, në librin me tri autore.
S’është hera e parë që raportohet për gabime nëpër libra shkollorë. Procesi i hartimit të teksteve shkollore ka kaluar jo rrallë pa debat dhe vërejtje politike.
KOHA ka nisur të shtunën pyetje në drejtim të Ministrisë së Arsimit nëse është në dijeni të këtij gabimi dhe çfarë masa janë ndërmarrë apo do të ndërmerren.
/ KOHA.net
