Fondacioni “Hasan Prishtina”, në bashkëpunim me Parlamentin Studentor kanë mbajtur një aksion simbolik para Kuvendit të Kosovës në kundërshtim të heqjes së emrit të Heroit Kombëtar Hasan Prishtina nga UP, – “Hasan Prishtina”.
“Kjo nismë e keqe ka filluar që një vit dhe kjo ka më shumë karakter politik. Në paaftësi për t’i zgjedhur problemet politike, këta sulmojnë figurat. Heqja e emrit të tij po bëhet me kërkesa të pa arsyeshme, të pa baza dhe ilegale me të cilën duhet të merret prokuroria”, tha stërnipi i Hasan Prishtinës njëherësh drejtor i Fondacionit, Mehmet Prishtina.
Edhe Florend Ramusa nga Parlamentit Studentor, tha se kundërshtojnë këtë nismë për heqjen e emrit të Hasan Prishtina.
“Ne e kundërshtojmë këte nismë. Ne kemi përdorur mekaniza protesta dhe peticione, sot ju kemi bashkuar kësaj nismë për tu solidarizu”, tha ai.
📷Valjeta Shala/RTK
Edhe stërnipi i Isa Boletinit, Gazmend Boletini është shprehur se si familjarë e kanë parë të arsyeshme që emri i Hasan Prishtinës të jetë i përjetshëm në Universitetin e Prishtinës.
“Kjo të mos jetë politike kjo është një dëshirë e jona që këta emra të mëdhenj t’i mbajmë me krenari. Meqenëse sot kemi ardhë me përkrahë emrin e Hasan Prishtinës ne si familjarë e kemi pa të arsyeshme që emri i tij të jetë i përjetshëm në UP”, është shprehur Boletini.
Në komisionin për Arsim do të shqyrtohet vendimi i Qeverisë për miratimin e statutit të ri të Universitetit të Prishtinës “Hasan Prishtina”, ku do të marrin pjesë ministria e Arsimit, Arbërie Nagavci, dhe rektori i UP-së Qerim Qerimi.
