Është rritur në 13 numri i nxënëseve në qytetin e Gjakovës që i kanë lënduar duart e tyre me mjete të mprehta të nxitur nga një video (lojë) në ‘TikTok’.
Dyshohet se këto nxënëse janë të klasave 6 deri 9 të shkollave në Gjakovë.
Drejtoresha e Arsimit, Eranda Kumnova-Baçi, ka konfirmuar për AlbanianEducaion.net se janë 13 nxënëse që janë lëndduar.
Sipas drejtoreshës Kumnova-Baçi, rastet janë shtuar pasi janë realizuar kontrollat e nxënëseve në klasa nga drejtorët e shkollave, së bashku me psikologun dhe kujdestarin e klasës.
“Sot masi u kam thanë drejtorëve të shkollave që me hy në kontrolla në krejt klasat, d.m.th. në ora 16:00 e kam marrë prej Policisë një numër deri në 13 raste. Pra, të konfirmuara janë 13 raste” , ka thënë Kumnova-Baçi.
Ajo ka thënë se nxënëset e vet-lënduara janë të shkollave të ndryshme në Gjakovë dhe se të gjitha janë vajza.
“Krejt janë vajza, janë të lënduara në duar, e njëjta, d.m.th. të njëjtat shenja janë, në dorë, vetëm në të dy duart”, tha ajo.
“Kjo është një sfidë është në ‘TikTok’ se unë hina edhe e pash masnej se më interesojke kështu. Ata e marrin mprehësen e lapsave, e kanë një pjesë të mprehtë që hjeket me një kështu të vogël që i mprejnë lapsat, a po e din, është si një brisk i vogël. Atë e hjekin dhe atë e marrin me veti, e përdorin me bo, d.m.th. me atë e bëjnë [lëndimin]” – ka treguar Kumnova-Baçi.
Ajo e ka konfirmuar se kontrollat e nxënësve në klasa nga drejtorët e psikologët e shkollave dhe kujdestarët e klasave në Gjakovë do të vazhdojnë dhe se nuk do t’u lejohet nxënësve përdorimi i telefonit gjatë kohës sa janë në shkollë.
“Po, edhe nesër [do të vazhdojmë me kontrolla të nxënësve në klasa], edhe i kemi ndalu prej nesër asnjë telefon. Me zbatu në përpikmëri edhe rregulloren komunale të Arsimit edhe udhëzimin e MASHTI-t që asnjë telefon ma në shkollë s’ka me pas”, ka theksuar Kumanova-Baçi.
