Nxënësja Riga Syla, e klasës 3/1 në shkollën “Daut Bogujevci”, në Fushë Kosovë ka shënuar një sukses të rëndësishëm në arenën ndërkombëtare, duke u shpallur fituese e vendit të parë në World Youth Science Competition 2026, shkruan AlbanianEducation.net.
Sipas njoftimit të shkollës, bëhet fjalë për një garë ndërkombëtare online në lëndën e Shkencës, e organizuar për nxënës të shkollave fillore nga vende të ndryshme të botës. Gara është zhvilluar në gjuhën angleze dhe ka testuar njohuritë, aftësitë dhe kompetencat shkencore të pjesëmarrësve.
Bazuar në rezultatet zyrtare të publikuara nga organizatorët, Riga Syla është shpallur CHAMPION, duke zënë vendin e parë në kategorinë e saj dhe duke përfaqësuar me sukses shkollën dhe Kosovën në këtë kompeticion ndërkombëtar.
Në reagimin e saj, shkolla “Daut Bogujevci” e ka cilësuar këtë arritje si dëshmi të përkushtimit, talentit dhe punës së vazhdueshme të nxënëses, duke theksuar se suksese të tilla janë motivim për të gjithë komunitetin shkollor.
Shkolla i ka uruar Rigës suksese të reja në rrugëtimin e saj arsimor dhe në garat e ardhshme, duke vlerësuar se ky rezultat e bën krenar të gjithë kolektivin e SHFMU “Daut Bogujevci”.
