Një sukses i jashtëzakonshëm ndërkombëtar vjen nga nxënësja Kiana Obërtinca, e cila ka arritur të fitojë Vendin e Parë në garën prestigjioze Turkic International Mathematical Olympiad – TIMO 2026.
Kiana, nxënëse e klasës IV/5, u dallua mes pjesëmarrësve nga shumë vende të botës, duke dëshmuar talent të spikatur, përkushtim dhe përgatitje të lartë në fushën e matematikës. Fitorja e saj e rendit atë në mesin e më të mirëve në këtë kompeticion ndërkombëtar.
Falë këtij rezultati të shkëlqyer, ajo ka siguruar kualifikimin për fazën e radhës të garës, e cila do të mbahet në Azerbajxhan, ku do të përfaqësojë me krenari Kosovën në arenën ndërkombëtare.
Ky sukses vjen si rezultat i punës së palodhshme dhe përkushtimit të saj të vazhdueshëm, si dhe mbështetjes profesionale nga mësimdhënësja e saj, Elenë Stublla.
Arritja e Kianës përbën një shembull frymëzues për bashkëmoshatarët e saj dhe një dëshmi se talenti dhe puna e vazhdueshme shpërblehen me rezultate të larta edhe në nivel ndërkombëtar.
