Kryetari i Komunës së Suharekës, Bali Muharremaj, ka bërë të ditur se sot është përcjellë ekipi i matematikës së bashku me koordinatorin për Kosovë, profesor Emin Hoxha, drejt Frankfurt, ku do të përfaqësojnë Kosovën në Finalen e Olimpiadës Botërore të Matematikës.
Sipas kryetarit Muharremaj, kualifikimi i gjashtë nxënësve nga Suhareka përbën një sukses të jashtëzakonshëm, pasi ata siguruan pjesëmarrjen pas konkurrencës me mbi 26 mijë nxënës nga 173 shtete të botës.
Ai theksoi se nxënësit u renditën në mesin e 20 për qind më të mirë në nivel ndërkombëtar, duke dëshmuar talentin, përkushtimin dhe potencialin e të rinjve suharekas në fushën e dijes.
Postimi i tij:
NGA SUHAREKA NË FRANKFURT – NË FINALEN BOTËRORE TË MATEMATIKËS
Sot me kënaqësi përcollëm ekipin tonë të matematikës dhe koordinatorin për Kosovë prof. Emin Hoxha, të cilët po nisen drejt Gjermanisë për të përfaqësuar Kosovën dhe Suharekën në Finalen e Olimpiadës Botërore të Matematikës në Frankfurt.
Është një krenari e veçantë që kualifikimi i gjashtë nxënësve tanë erdhi pas një konkurrence të fortë me mbi 26,000 nxënës nga 173 shtete të botës. Këta talentë u renditën në 20% e parë në nivel ndërkombëtar, duke dëshmuar se rinia jonë nuk ka kufij kur bëhet fjalë për dije dhe përkushtim.
Bashkë me Drejtorin e Arsimit, z. Remzi Bajselmani, i uruam rrugë të mbarë koordinatorit Emin Hoxha dhe nxënësve tanë. Komuna e Suharekës do të vazhdojë të jetë krah i fortë i nxënësve në arenat ndërkombëtare.
Gjashtë kampionët tanë janë gati të matin forcat me mendjet më të ndritura të botës. Ne besojmë në dijen e tyre dhe jemi të bindur se do të kthehen me suksese që do të na bëjnë të gjithëve krenarë.
Suksese ekipit tonë në Frankfurt! Na priftë e mbara! 🇽🇰📐🇩🇪
