Nuk janë të rralla rastet kur nxënësit nëpër shkollat fillore e të mesme në Kosovë dëmtojnë pajisjet brenda hapësirave të shkollave. Një rast i tillë dyshohet se ka ndodhur në gjimnazin “Haxhi Zeka” në Istog.
Në disa pamje të publikuara dje, në rrjetin social “Tik Tok”, nga vet një nxënës, të cilat i publikoj Sinjali, shihet se si dëmtohen pajisjet e ndryshme që nevojiten në procesin mësimor. Dy prej tyre heqin pjesë nga tastiera e një kompjuteri në kabinetin e Informatikës.
Pamjet pasqyrojnë edhe veprime të tjera të pahijshme të nxënësve në këtë shkollë, ku një nxënës shihet se teksa konsumon cigare, thyen njërën nga dyert në tualet.
Nga ky gjimnaz e kanë konfirmuar se rasti ka ndodhur në këtë shkollë, por pretendojnë se pamjet janë të para dy vitesh.
“Një video e cila po qarkullon kohëve të fundit në portale ku shihen nxënës të Gjimnazit “Haxhi Zeka” në Istog duke i dëmtuar pajisjet shkollore dhe inventarin shkollor është video e para 2 viteve ku shihen nxënësit me iniciale E. Z., V. Z. dhe E. H., ndaj të cilëve shumë herë janë shqiptuar masa ndëshkuese disiplinore”, thuhet në njoftimin në Facebook.
