Në kuadër të aktiviteteve për shënimin e 17 Shkurtit – Ditës së Pavarësisë së Kosovës, nxënësit e Shkolla “Shaban Shabani” në Llapushnik të komunës së Dragashit, realizuan një aktivitet të veçantë dhe kreativ, duke simbolizuar përmes formulave matematikore urimin: “Urime 17 Shkurti – Dita e Pavarësisë”.
Nën udhëheqjen e mësimdhënësit Leutrim Qengaj, nxënësit treguan se matematika nuk është vetëm shkencë e numrave dhe logjikës, por mund të shërbejë edhe si mjet shprehjeje për ndjenjat më të thella atdhedashurie dhe respekti për shtetin.
Përmes gjuhës universale të matematikës, ata përcollën një mesazh të fuqishëm për rëndësinë e kësaj date historike për popullin e Kosovës, duke dëshmuar kreativitet, përkushtim dhe vetëdije qytetare.
Ky aktivitet u mirëprit nga komuniteti shkollor, duke e bërë festën e pavarësisë edhe më domethënëse për nxënësit dhe mësimdhënësit.
