Nxënësi Noar Prapashtica nga klasa e gjashtë e shkollës “Mehmet Gjevori” ka shënuar një tjetër sukses të rëndësishëm në fushën e matematikës, duke u kualifikuar në finalen ndërkombëtare të garës prestigjioze “Einstein Olympiad”, e cila do të mbahet në Berlin të Gjermanisë, shkruan AlbanianEducation.net.
Ky rezultat vjen pas paraqitjes së shkëlqyer të Noarit në garën e matematikës TIMO, ku ai fitoi vendin e dytë në nivel të Kosovës, duke dëshmuar njohuritë dhe aftësitë e tij të larta në këtë lëndë.
Sipas njoftimit të shkollës “Mehmet Gjevori”, nxënësi mori pjesë edhe në garën ndërkombëtare “Einstein Olympiad”, ku konkurruan nxënës nga vende të ndryshme të botës, ndërsa performanca e tij i siguroi një vend në finalen e madhe të këtij kompeticioni.
Shkolla ka shprehur krenarinë për arritjet e nxënësit, duke vlerësuar punën, përkushtimin dhe talentin e tij, si dhe i ka uruar suksese në përfaqësimin e Kosovës në finalen që do të zhvillohet në Berlin.
Kualifikimi në një garë të tillë ndërkombëtare konsiderohet një arritje e rëndësishme, jo vetëm për nxënësin, por edhe për shkollën dhe komunitetin arsimor në vend.
