Nxënësi shqiptar Loris Qose ka arritur një sukses të jashtëzakonshëm në arenën ndërkombëtare, duke fituar Medaljen e Artë në Finalen e Madhe të International STEM Olympiad, ku morën pjesë garues nga 56 shtete të botës, shkruan AlbanianEducation.net.
Sipas njoftimit të Drejtorisë Rajonale të Arsimit Parauniversitar në Korçë, kjo arritje është rezultat i talentit, përkushtimit dhe punës së palodhur të Lorisit, i cili u dallua mes pjesëmarrësve në një nga garat më prestigjioze ndërkombëtare në fushën e STEM-it.
Në këtë sukses ka dhënë një kontribut të rëndësishëm edhe mësuesja e matematikës, Flutura Hoxholli, e cila e ka përgatitur dhe udhëhequr nxënësin me profesionalizëm gjatë gjithë rrugëtimit të tij drejt finales.
Ky triumf përbën një moment krenarie për shkollën, familjen dhe komunitetin arsimor, duke dëshmuar se puna e vazhdueshme, talenti dhe mbështetja cilësore në arsim mund të sjellin rezultate të nivelit më të lartë në garat ndërkombëtare.
