Ministrja e Arsimit, Arbërie Nagavci, thotë se humbjet që ka shkaktuar pandemia janë shumë serioze dhe me ndikim afatgjatë në të ardhmen e fëmijëve tanë, si dhe në mirëqenien e zhvillimin e shoqërisë.
Ajo thotë se MAShTI po punon me intenzitet të shtuar për të përmirësuar rezultatet në arsim, por shton se bashkëpunimi i ngushtë mes prindërve, mësimdhënësve dhe nivelit lokal e qendror, është i domosdoshëm.
“Nuk kemi kohë të presim!”, thotë Nagavci,
Postimi i saj:
Fëmijët tanë kanë nevojë për ne!
Secili dhe së bashku t’i zbusim humbjet nga pandemia dhe t’i përmirësojmë rezultatet në arsim.
Humbjet që ka shkaktuar pandemia janë shumë serioze dhe me ndikim afatgjatë në të ardhmen e fëmijëve tanë, si dhe në mirëqenien e zhvillimin e shoqërisë. Këtë e kanë dëshmuar tashmë analizat dhe vlerësimet e bëra nga institucione e organizata të rëndësishme në botë, të cilat kanë vlerësuar se humbjet që pandemia Covid-19 ka shkaktuar në arsim ishin më të mëdha se sa u parashikuan.
Banka Botërore ka vlerësuar se para pandemisë, 57% e dhjetëvjeçarëve në vendet me të ardhura të ulëta dhe të mesme nuk mund të lexonin një histori të thjeshtë, ndërsa kjo shifër mund të jetë rritur në 70%.
Po ashtu, Banka Botërore ka vlerësuar se ndërprerja e mësimit gjatë pandemisë mund t’u kushtojë fëmijëve 21 trilion dollarë fitime gjatë jetës së tyre, ndërsa analistët tërheqin vëmendjen se dëmi mund të jetë masiv në shumë vende me të ardhura mesatare, e ku bën pjesë edhe Kosova.
Këto analiza dhe shumë të tjera të bëra për ndikimin e pandemisë në arsim, si dhe në shëndetin mendor e fizik të fëmijëve, janë tregues të qartë se fëmijët tanë kanë nevojë për përkrahje në shumë aspekte, që të mund të shfrytëzojnë potencialin e tyre dhe të zënë hapin.
MAShTI po punon me intenzitet të shtuar për të përmirësuar rezultatet në arsim, por bashkëpunimi i ngushtë mes prindërve, mësimdhënësve dhe nivelit lokal e qendror, është i domosdoshëm.
Nuk kemi kohë të presim!
