Në Tetor të vitit të kaluar emisioni “Stop” transmetoi rastin e vajzës së vogël Eleni Skënderaj.
Në 28 Gusht, 13-vjeçarja u godit nga një kamion në Tiranë. Aksidenti i rëndë i dëmtoi asaj organet jetësore, ndaj kishte nevojë për një seri ndërhyrjesh.
“Unë isha duke shkuar në dyqan dhe kur po kthehesh po kaloja tek vijat e bardha. Aty ishte një kamion i ndaluar. Por në momentin që kalova unë, ai nuk më pa dhe u nis. Më përplasi… Nuk i ndjeja këmbët fare. Kisha dhimbje nga trupi në pjesën sipër, por përsëri këmbët nuk i ndjeja fare dhe mendova se u paralizova. Në atë moment, humba ndjenjat ”, këto ishin fjalët e pakta të vajzës e cila me lot në sy rrëfeu tmerrin që përjetoi.
Vetëm pak ditë pas apelit të “Stop”, u sigurua shuma prej 80 mijë dollarësh, që duhej për transportin me avion mjekësor dhe ndërhyrjet. Po si është sot gjendja e Elenit, pas ndërhyrjeve? Ne kemi shkuar në klinikën Psiko Medikal Fizioterapi, pasi 13-vjeçarja bën aty seancat e fizioterapisë. Eleni Skënderaj shprehet e lumtur, që ia doli asaj situate dhe falenderon emisionin “Stop” dhe “Fundjavë ndryshe”.
Eleni: Përshëndetje! Jam vajza e cila u aksidentua me datën 28 Gusht nga një kamion. Lajmin për aksidentimin tim u shpërnda për shkak të “Fundjavës Ndryshe” dhe emisionit “Stop” dhe brenda pak ditësh u mblodh shuma për dërgimin tim në Turqi, e cila mundësoi dhe shërimin tim. Falenderoj “Fundjavën Ndryshe” dhe emisionin “Stop” dhe të gjithë shqiptarët që kontribuan për shërimin tim. Ju dua shumë.
Po kaq i lumtur është dhe babai i saj Edmond Skënderaj.
Gazetarja: Jemi pas operacionit, si ndihesh?
Eleni: Ndihem shumë mirë, jam shumë e gëzuar. Faleminderit për gjithçka. Jam shumë e gëzuar që tani ndodhem këtu pranë shoqevë dhe shokëve të mi.
Edmond Skënderaj: Pas operacionit të gocës në Turqi, gjendja e gocës është shumë herë me e mirë. Fizioterapisti sapo e dëgjoi rastin e Elenit, e mori për një periudhë shumë të gjatë falas.
Bela Allaraj, fizioterapiste, shpjegon se ka besim që për 4-5 muaj Eleni do të rehabilitohet plotësisht.
Bella Allaraj: Të gjithë e kemi parë rastin tek emisioni “Stop” dhe më pas unë pashë që kishte ardhur nga Turqia dhe Arbri dhe “Fundjava Ndryshe” e kishin nxjerrë që Elenit i duheshin disa muaj fizioterapi. Kontaktova “Fundjavën Ndryshe” dhe “Fundjave Ndryshe” ishte dakord për këtë.
Gazetarja: Sa seanca fizioterapi i duhen Elenit?
Bella Allaraj: 4-5 muaj.
Gazetarja: Si po ecën Eleni në këto seanca fizioterapie?
Bella Allaraj: Sot është java e dytë që ka filluar dhe po ecë shumë mirë. Ka filluar të ecë pa paterica. Kemi bërë disa lëvizje të vogla. Ushtrimet që i kemi dhënë ne i bën edhe në shtëpi dhe këtu është shumë bashkëpunuese dhe është e gatshme për çdo ushtrim që i themi ne dhe nuk di të thotë asnjëherë jo.
Gazetarja: Do na demonstrosh tani që mundesh të ecësh pa paterica?
Eleni: Patjetër që po, në shenjë falenderimi për të gjithë ata që kanë kontribuar për mua dhe për shërimin tim. Ju falenderoj shumë nga zemra të gjithëve.
Edmond Skënderaj: Shumë faleminderit “Fundjavës Ndryshe”, emisionit “Stop” dhe të gjithë bamirësëve që kanë kontribuar për vajtjen në Turqi. Faleminderit dhe fizioterapistëve që morën përsipër fizioterapinë e gocës për një periudhë të gjatë. Ju falenderoj nga zemra të gjithëve.
