Janë mësues, ata që edukojnë brezin e ri, por që janë njerëz me problemet e tyre si të gjithë ne. Në jetë sot të buzëqeshësh është një dhuratë lumturie më shumë se çdo dhuratë materiale për mësuesit.
“Të lutem, nga ty kërkojmë një gjë të vogël, por për ne është e madhe: të buzëqeshësh gjithmonë dhe të mos jesh kurrë e mërzitur. Mësuesja, nëna jonë e dytë”, është letra e nxënësve të një klase në shkollën “Ali Agjah” të Elbasanit për mësuesen e tyre Ilirjana Herri.
Fjalë fëmije por që mësuesen e nxorën nga gjendja e vështirë që e kishte futur jeta. “Unë rashë në gjendje tepër të trishtueshme. Forcën e gjeta pikërisht te kjo letër. Unë buzëqesha pikërisht për këta fëmijë”, thotë mësuese Lili për korrespondenten e Top Channel, Bruna Kuçyku.
Do të kalojnë breza të tërë fëmijësh, të cilët plot me dashuri mësuese Lili do t’i përcjellë në rrugën e jetës. Plot 7 Marse do të festojë, por asnjëherë nuk do të harrojë këtë letër, asnjëherë nuk do të harrojë se nxënësit janë familja e saj.
Mësuesi është prind i dytë, jemi mësuar të dëgjojmë përherë, por edhe pse brezat ndërrohen, fëmijët rriten, ata mbeten familja e dytë dhe e çmuar e çdo mësuesi.
