Një portret i ri familjar i Dukës dhe Dukeshës së Kembrixhit, William dhe Kate, dhe tre fëmijëve të tyre, George, Charlotte dhe Louis, është publikuar për kartolinën e tyre zyrtare të Krishtlindjeve të këtij viti.
Fotoja, e shkrepur në vjeshtë nga fotografi Matt Porteous, tregon familjen përpara një grumbulli druri në Anmer Hall, rezidenca e tyre në Norfolk, të Anglisë lindore.
Familja mbretërore zakonisht e kalon periudhën e pushimeve në Sandringham, ku mbretëreshës zakonisht i bashkohen fëmijët, nipërit dhe mbesat e saj. Por për shkak të pandemisë së koronavirusit, ky sezon festiv do të jetë ndryshe nga të mëparshmit.
Mbretëresha Elizabeth dhe Princi Philip, Duka i Edinburgut, do t’i festojnë Krishtlindjet e këtij viti me njëri-tjetrin në Kështjellën Windsor, sipas një zëdhënësi të Pallatit Buckingham.
“Duke marrë në kosideratë të gjitha këshillat, Mbretëresha dhe Duka i Edinburgut kanë vendosur që këtë vit t’i kalojnë Krishtlindjet qetësisht në Windsor,” tha deklarata për shtyp.
Mbretëresha dhe Princi Philip e kanë kaluar shumicën e kohës këtë vit në Windsor Castle, pasi u larguan nga Pallati Buckingham gjatë valës së parë të Covid-19 në pranverë.
