Ishte një ditë e zakonshme në një klasë të shkollës fillore në Loutraki, derisa një incident i papritur e tronditi mësuesin dhe komunitetin shkollor. Një nxënës 6-vjeçar, i cili sapo kishte filluar klasën e parë, e fyente dhe e prekte mësuesen në mënyrë të papërshtatshme.
Ngjarja u raportua menjëherë te autoritetet, por ajo që ndodhi më pas e bëri të qartë se kjo nuk mund të shihej thjesht si një çështje ligjore.
“Është normale që mësuesja të ndihet jo rehat, por nuk ishte qëllimi i fëmijës të bëjë keq”, shpjegon psikologia e fëmijëve Aspasia Tsolaki. Ajo thekson se një fëmijë kaq i vogël e kupton se nuk duhet të prekë të tjerët, por nuk di saktësisht pse.
“Mënyra e duhur është t’i tregojmë me kujdes se kjo nuk lejohet, pa e kthyer në problem për të gjithë klasën”, thotë ajo.
Psikoterapistja dhe specialiste e traumës, Ioanna Konstantinidou, thekson se një ankesë formale mund të stigmatizojë fëmijën. “Çdo fëmijë 6-vjeçar vepron impulsivisht ose imiton sjelljet që sheh. Ai nuk ka qëllime të këqija, nuk mund të gënjejë si një i rritur”, shprehet Konstantinidou.
Në anën tjetër, mësuesja e përfshirë në incident, e tronditur nga ajo që ndodhi, thotë se veprimi i saj kishte synimin të ndihmonte fëmijën dhe të nxisë prindërit që të marrin përgjegjësinë seriozisht.
“Jo se dua të alarmoj njerëzit, por se fëmija duhet të kuptojë se disa gjëra nuk lejohen. Çfarë do të ndodhë vitet e ardhshme nëse nuk ndërhyhet tani? Çfarë do të ndodhë me të dhe me të tjerët?” shpjegon ajo.
Edhe mësuesi i pensionuar Grigoris Daskos ka një këndvështrim të qartë: mësuesit kanë mjetet për të zgjidhur situata të tilla pa nevojën e Policisë. “Çelësi është menaxhimi shkencor dhe jo ndëshkimor. Mësuesi është edhe edukator”, thotë ai.
Sipas ekspertëve, reagimi i duhur duhet të përfshijë mbështetje psikologjike për mësuesin, informimin diskret të prindërve dhe shkollës dhe vlerësimin e fëmijës nga psikologët dhe punonjësit socialë.
Diskutimet duhet të bëhen me gjithë klasën pa stigmatizuar askënd, sepse çdo incident i vogël mund të ndikojë në mjedisin e të gjithë nxënësve.
Ngjarja në Loutraki tregon qartë se sfidat në klasat e para nuk mund të zgjidhen me ligj ose dënim. Ato kërkojnë mirëkuptim, kujdes dhe udhëzim të qartë – një qasje që i mëson fëmijët dhe mban të qëndrueshëm mjedisin e shkollës.
