Në çdo klasë, në çdo shkollë, çdo vit shkollor, përballemi me të njëjtin fenomen: nxënës dhe prindër që kërkojnë nota të larta pa u përpjekur mjaftueshëm, pa treguar vlera reale, pa respektuar procesin e dijes dhe përkushtimit. Kjo sjellje, e përhapur për fat të keq në shumë mjedise shkollore, minon jo vetëm etikën e vlerësimit, por edhe vetë kuptimin e arsimit.
E para arsye pse nota duhet të fitohet me meritë është se arsimi ka si qëllim të përgatisë qytetarë të ndershëm, të përgjegjshëm dhe të aftë. Nëse një nxënës mëson se mund të arrijë rezultate pa mund, atëherë mëson një mësim të rremë për jetën: që suksesi nuk kërkon përpjekje, por lidhje, presion apo manipulim. Kjo krijon individë që më vonë në jetë, në vend të kompetencës, do të kërkojnë kompromise, rrugë të shkurtëra dhe padrejtësi për të arritur qëllimet e tyre.
Së dyti, mësuesi nuk është vetëm një vlerësues i shifrave. Ai është një udhëheqës në rrugën e dijes, një figurë që duhet të jetë e respektuar për drejtësinë dhe profesionalizmin e tij. Kur i kërkohet një note që nuk përputhet me aftësitë reale të nxënësit, në fakt kërkohet që ai të braktisë parimet e veta. Kjo cenon autoritetin e tij, e kthen vlerësimin në një teatër të rremë dhe humbet kuptimi i përkushtimit të tij të përditshëm.
Një tjetër aspekt shqetësues është ndikimi që kjo sjellje ka tek vetë nxënësit. Ata që vërtet përpiqen, që mësojnë dhe e ndiejnë notën si një shpërblim të drejtë për punën e tyre, ndihen të zhgënjyer kur shohin që një tjetër e merr të njëjtën notë pa sakrificë. Në këtë mënyrë, demotivohet përpjekja, zbehet drejtësia dhe rritet një ndjenjë mosbesimi ndaj sistemit arsimor.
Prindërit, në vend që të kërkojnë nota, duhet të kërkojnë zhvillim, përmirësim dhe përpjekje. Fëmijët nuk kanë nevojë për dhjetës të rremë, por për përkrahje në rrugëtimin e tyre arsimor, edhe kur ai është i vështirë. Nota është një pasqyrë momentale, por vlerat që mbillen gjatë shkollimit janë ato që formësojnë të ardhmen e një individi.
Në përfundim, një shoqëri që ushqen iluzionin se çdo gjë mund të blihet apo kërkohet, pa u merituar, është një shoqëri që rrezikon të shkatërrojë themelet e drejtësisë, përpjekjes dhe ndershmërisë. Shkolla duhet të mbetet një hapësirë ku nota është rezultat i dijes dhe përkushtimit, jo i presionit dhe ndërhyrjes. Vetëm kështu mund të ndërtojmë një të ardhme më të mirë për të gjithë.
@albanianeducation.net
