Është e vështirë të gjesh fjalët e duhura kur pothuajse gjithçka është thënë.
Megjithatë, mbetet shqetësuese situata kur një mësimdhënës, sidomos në prag të pensionimit, fillon ta humbë autoritetin jo për shkak të mungesës së përkushtimit apo profesionalizmit, por si pasojë e rrethanave të reja shoqërore dhe teknologjike.
Shtrohet me të drejtë pyetja se deri ku lejohet përdorimi i telefonave në ambientet shkollore dhe ku fillon cenimi i dinjitetit të mësimdhënësit.
Bullizimi përmes incizimeve dhe shpërndarja e tyre në rrjete sociale si TikTok, Facebook apo Snapchat nuk është thjesht një shkelje etike, por një problem serioz arsimor dhe shoqëror.
Kjo sjellje jo vetëm që dëmton autoritetin e mësimdhënësit, por krijon një precedent të rrezikshëm për nxënësit, duke i nxitur ata të shohin talljen dhe poshtërimin si diçka normale apo edhe të pranueshme.
Mbetet për t’u reflektuar edhe roli i mediave dhe rrjeteve sociale, nëse ato do të shërbejnë si mjet edukimi dhe vetëdijesimi apo si platforma për promovimin e këtyre incizimeve.
Ndikimi i kësaj dukurie tek nxënësit është i drejtpërdrejtë, sepse çdo tolerim apo heshtje e tillë mund të kthehet në nxitje për sjellje të ngjashme, duke e cenuar rëndë klimën edukative dhe respektin ndaj institucionit të shkollës.
© AlbanianEducation.net – Të gjitha të drejtat e rezervuara
