Shikim në bardhësi
QË DRITA TË MOS SHUHET
(Me rastin e Ditës së Alfabetit të Gjuhës Shqipe)
Nuk kam ndërmend ta bëj historinë e sakrificës, heroizmit dhe përkushtimit të të gjithë atyre që mbajtën gjallë arsimin shqip në kohën kur qenies sonë kombëtare i kanosej rreziku i zhbërjes dhe asgjësimit.
Ajo histori është shkruar! Rasti unikat në botë për qëndresë me çdo kusht të rilindasve tanë dhe pinjollëve të tyre për ndriçimin e rrugës drejt qytetërimit, bëri jehonë në tërë botën dhe na bëri përjetësisht krenarë e pronarë të kësaj vlere universale.
Mirëpo, sot, me veprimet dhe mosveprimet e tarafeve e individëve injorantë e të pandërgjegjshëm, kjo vlerë mund të zbehet për motive të ulëta, me qëllim të përfitimit të tyre në skenën e llojit të bajraktarëve të arealit tonë socio-politik.
Andaj, të gjithë ne që e kemi vazhduar, jetësuar e krijuar këtë vlerë në momente kritike të historisë sonë, të vazhdojmë të ecim shtigjeve të atyre që mbajtën lart dritën e qytetërimit! Drita nuk bën të zbehet! Drita nuk guxon të shuhet! Rilindje e Dritë e Përjetësi Arsimit Shqip!
/AlbanianEducation.net/.
