Bashkimi i Sindikatave të Pavarura të Kosovës (BSPK), i ka dhënë afat Qeverisë së Kosovës deri më 17 gusht që t’u përgjigjet kërkesave të tyre, në të kundërtën paralajmërojnë se do të mbajnë grevë të përgjithshme.
Nënkryetarja e Sindikatës së Bashkuar të Arsimit dhe Kulturës (SBASHK), Vjollca Shala, në një prononcim për Telegrafin, deklaroi se nëse ekzekutivi nuk reflekton, kryetari i BSPK-së është i autorizuar për të shpallur grevën.
Një gjë e tillë sipas saj, është vendosur në mbledhjen e fundit të mbajtur nga sindikalistët.
BSPK paralajmëron veprime sindikale: E duam Qeverinë në tavolinën e bisedimeve
“Është mbajtur një mbledhje e BSPK-së ku është vendosur që nëse deri më 17 gusht nuk marrin përgjigje nga Qeveria lidhur me kërkesat tona, atëherë kryetari i BSPK-së shpall grevë të përgjithshme nesër eventualisht pasnesër”, deklaroi Shala.
Nënkryetarja e Sindikatës së Bashkuar të Arsimit dhe Kulturës (SBASHK), Vjollca Shala
Ndryshe, kryetari i BSPK-së, Atdhe Hykolli, është pritur në takim nga Ministri i Financave, i Punës dhe i Transfereve, Hekuran Murati, më 7 korrik.
Në këtë takim, BSPK-ja ka njoftuar se Hykolli i ka parashtruar ministrit kërkesën për subvencionimin e punëtorëve me nga 100 euro shtesë në pagë, deri në miratimin e Ligjit të Pagave.
Po ashtu, është bërë e ditur se ai e ka informuar Muratin se BSPK-ja do të ndërmarrë veprime sindikale nëse ekzekutivi nuk vepron.
Ndërkaq, kërkesat e kahmotshme të sindikatave janë:
Rritja e pagave për 100 euro për të gjithë të punësuarit që marrin paga nga buxheti i Kosovës deri sa të përmbushen kërkesat e mëposhtme.
Miratimi i Ligjit të Pagave.
Rritja e rrogës minimale
Fillimi i zbatimit të Ligjit për Sigurimin Shëndetësor
Plotësim-ndryshimi i Ligjit për Skemat Pensionale
Të ndryshohet neni në Ligjin e Sigurisë Pensionale të vitit 1983, sipas të cilit, kërkohet që të ketë 15 vjet kontribut në skemat pensionale para datës 01.01.1999.
