Mosekzekutimin e pagave për punëtorët që ishin pjesë e grevës, e ka cilësuar vepër penale, shefi i GP të Partisë Demokratike të Kosovës, Abelard Tahiri.
Ai ka paralajmëruar kallëzim penal ndaj ministrit të Financave, Hekuran Murati, nëse punëtorët e sektorit publik që për më shumë se pesë javë ishin në grevë, nuk i marrin pagat.
“Në do të presim në një afat prej 5 ditëve që të ekzekutohen pagat, nëse brenda këtyre 5 ditëve të punës, nga dita e premte kur është dashur të ekzekutohen pagat, nuk ekzekutohen deri të enjten, ne do të bëjmë një kallëzim penal ndaj ministrit. Mosekzekutimi i pagave nga ministrit është vepër penale dhe ne në Prokurorinë Speciale do të bëjmë kallëzim penal”, ka thënë ai.
Greva e mësimdhënësve, e punonjësve të administratës publike dhe të tjera nisi më 25 gusht dhe u pezullua të shtunën (1 tetor).
