Për nder të 144 vjetorit të Lidhjes Shqiptare të Prizrenit sot të gjitha shkollat në Kosovë dhe Shqipëri do t’ia kushtojnë orën e parë të mësimit kësaj ngjarje të rëndësishme të historisë shqiptare.
Këtë e ka bërë të ditur ministrja e Arsimit, Arbërie Nagavci, e cila tha se bashkë me homologen e saj shqiptare e kanë marrë këtë vendim.
“Jam e lumtur që këtë vendim e kemi marrë bashkë me ministren e Arsimit të Shqipërisë, znj. Evis Kushi, për t’ua mundësuar nxënësve tanë në të dyja vendet, që të flasin njëkohësisht për Lidhjen Shqiptare të Prizrenit. Kështu, ne po bartim së bashku te gjeneratat e reja veprën frymëzuese të intelektualëve dhe atdhetarëve të kohës dhe lavdinë e historisë shqiptare”.
Sot shënohet 144 vjetori i Lidhjes Shqiptare të Prizrenit, ngjarje e cila konsiderohet si më e rëndësishmja në historinë e kombit shqiptar.
