Vetëm edhe dy ditë kanë mbetur që nga data e fillimit të vitit të ri shkollor.
Por kjo datë, ende nuk dihet nëse do të jetë fillim i vitit të ri shkollor apo fillimi i një potere në lidhje me grevën e paralajmëruar nga punëtorët e arsimit, e nisur më 25 gusht.
Që nga kjo datë kur SBASHK-u e filloi grevën e paralajmëruar së bashku me sindikalistët e sektorëve tjerë, qeveria nuk u ka dhënë as edhe një sinjal.
Përveç lajmit të një qarkoreje të Zëvendës-sekretarit të Përgjithshëm të Ministrisë së Financave, Enis Spahiu, i cili ka kërcënuar punëtorët e kësaj qeverie me ndalim të pagave nëse hyjnë në grevë.
SBASHK-u nuk ‘zbutet’
Kryetari i Sindikatës së Arsimit, Rrahman Jasharaj, për gazetën tha se përderisa qeveria nuk po jep as edhe një sinjal, greva vazhdon.
Ai tha se nuk kanë marrë as edhe një shkëndijë shprese nga qeveria.
“Ne qëndrojmë në vendimet të cilat i kemi marrë me zërin e anëtarësisë. Që nga 25 gushti fatkeqësisht greva do të vazhdojë, përderisa qeveria nuk ulet me sindikatat për të gjetur zgjidhje. Kjo grevë nuk po bëhet për inate të askujt, por duke u bazuar në zërin e anëtarësisë. Ne i kemi shterrë të gjitha mundësitë për mos me ardhë tek grevat, por qeveria nuk ka reflektuar dhe nuk po reflekton. Fatkeqësisht asnjë shkëndijë shprese nuk e kemi nga qeveria që diçka do të ndodhë, kjo na bën me pyetë se pse qeveria në këtë mënyrë po vepron përderisa jemi në greva”, tha Jasharaj.
Këshilli i Prindërve në një përgjigje për gazetën thotë se do të dalin me qëndrim pas mbledhjes të cilën do ta mbajnë më 31 gusht.
“Takimi i kryesisë së Këshillit të Prindërve është caktuar më 31 gusht. Pas takimit, Këshilli do të dalë me qëndrim lidhur me grevën dhe fillimin e vitit të ri shkollor 22/23”, tha anëtari i Kryesisë, Labinot Salihu. / NACIONALE
