“Integriteti dhe transparenca në arsimin e lartë janë prioritete të Qeverisë dhe MASHTI-t”. Kështu tha ministrja e Arsimit, Arbërie Nagavci në Konferencën për arsimin e lartë “Integriteti dhe transparenca në arsimin e lartë: Sfidat dhe rrugët për përmirësim”, shkruan AlbanianEducation.net.
Ajo tutje tha se është e lumtur që qëllimet e këtij projekti janë drejtpërdrejt të lidhura me një nga prioritetet kyçe të Qeverisë, siç pohoi që është ngritja e cilësisë në arsimin e lartë.
“Puna jonë drejt përmirësimit të cilësisë së arsimit përballet me sfida të vazhdueshme, të cilat më së miri mund t’i tejkalojmë nëse jemi bashkëpunues e konsistent në qëndrimet tona”.
“Kjo ngase, arsimi i prek të gjithë, ndikon në çdo aspekt të jetës, dhe është instrumenti bazë për ndërtimin e një shoqërie të civilizuar”.
“Në fushën e arsimit janë të njohura vështirësitë dhe pengesat andaj, shpresoj se të gjithë kemi një qëllim të përbashkët, t’i shërbejmë një përfituesi të vetëm: shoqërisë së Kosovës”, tha Nagavci. /AlbanianEducation.net/.
