Minsitrja e Arsimit, Arbërie Nagavci, ka preznatuar të enjten strategjinë e Arsimit 222-2026, që është dokument bazë për zhvillimin e sistemit arsimor në vend.
Nagavci thotë se kjo Strategji ka 5 shtylla kryesore që mund t’i lexoni në poshtë:
Postimi i saj:
Arsimi është mjeti më i rëndësishëm për zhvillim të qëndrueshëm shoqëror dhe ekonomik të vendit tonë.
Prezantuam sot Strategjinë e Arsimit për periudhën 2022-2026 e cila është dokumenti bazë për zhvillimin e Sektorit të arsimit në 5 vitet e ardhshme dhe produkt i punës disamujore.
Në këtë strategji e cila bazohet në analizë të hollësishme të gjendjes në sektorin e arsimit, kanë punuar mbi 150 specialistë të profileve të ndryshme.
Ky dokument është i harmonizuar me Draft Strategjinë Kombëtare të Zhvillimit, me Programin Qeverisës për periudhën 2021-2025, si dhe shpreh përcaktimet e Republikës së Kosovës për të qenë në linjën e objektivave zhvillimore të mijëvjeçarit dhe politikat evropiane për arsimin dhe trajnimin.
Strategjia e Arsimit 2022-2026 ka 5 shtylla kryesore:
📌Edukimi në fëmijërinë e hershme, ku synojmë rritje domethënëse të pjesëmarrjes së fëmijëve të moshës 0-5 vjeç, por edhe përmirësim të cilësisë së shërbimeve.
📌Ngritja e cilësisë së arsimit parauniversitar, ku fokusi ynë do të jetë ndërtimi dhe konsolidimi i mekanizmave për mësimdhënie cilësore dhe sigurim të cilësisë.
📌Harmonizimi i arsimit dhe aftësimit profesional me zhvillimet e teknologjisë dhe tregut të punës, për të siguruar fuqi punëtore të kualifikuar dhe të përgatitur mirë.
📌Cilësia, integriteti dhe konkurrueshmëria e arsimit të lartë.
📌Përdorimi i teknologjisë digjitale për përmirësimin e shërbimeve dhe të cilësisë në arsim, në përputhje me trendet e transformimit digjital.
Falenderoj Qeverinë e Republikës Federale Gjermane për mbështetjen në procesin e hartimit të Strategjisë si dhe Qeverinë e Mbretërisë së Bashkuar për mbështetjen në zhvillimin e komponentës së digjitalizimit.
Po ashtu, falënderoj të gjithë partnerët zhvillimorë dhe të gjithë ata që kanë kontribuar në cilësinë e ekspertëve, koordinatorëve e pjesëmarrësve në grupet e punës dhe për komentet e tyre në fazën e konsultimeve.
Si Ministri e Arsimit jemi të përkushtuar që këtë plan veprimi ta zbatojmë me përpikëri, duke i kontribuar kështu përmirësimit të gjendjes në arsim.
