Ministria e Arsimit nën udhëheqjen e Arbërie Nagavcit për katër vjet ka arritur t’i pajisë me licencë vetëm 7 mësimdhënës.
Ministrja në detyrë, Arbërie Nagavci deklaroi në emisionin “Kallxo Përnime” se fillimi i vlerësimit të mësimdhënësve për licencë të avansuar është një nga arritjet më madhore dhe më të rëndësishme të kësaj qeverie në arsim.
Nagavci ka treguar se në provimin për licencë të avancuar për mësimdhënie kanë hyrë më shumë se 150 mësimdhënës nga përafërsisht 22,000 që i ka Kosova, sipas të dhënave nga Agjencia e Statistikave të Kosovës për vitin 2023/2024.
Këta 150 ishin të vetmit që në baza vullnetare kanë pranuar të hynë në test dhe shumica dërmuese e tyre kanë ra prej testit.
Megjithatë, për Nagavcin numri i licencimit të mësimdhënësve është shumë i madh dhe është proces që vazhdon në vijimësi.
“Janë tri nivele të licencave: licenca bazike- pra e nivelit të parë, e nivelit të dytë dhe licenca e avansuar që përcillet edhe me rritje të pagës që është niveli i tretë. Për nivelin e tretë është hera e parë që e kemi bërë (vlerësimin). I kemi vetëm 7 mësimdhënës që me sukses e kanë kaluar testin. Kanë apliku shumë më shumë. Kanë marrë pjesë në test më shumë se 150 e diçka mësimdhënës dhe i kemi të suksesshëm 7 mësimdhënës” – ka deklaruar Nagavci në “Kallxo Përnime”.
Sipas Nagavcit, testimi për licencë të avansuar është bërë te mësimdhënësit e klasave 1 – 5, si dhe te mësimdhënësit e Matematikës dhe Gjuhës shqipe, pasi janë lëndë bazike dhe vlerësohen në testin PISA.
“Unë jam shumë e lumtur që për herë të parë pas 20 viteve, ne kemi vendosë sistemin profesional dhe të plotësuar të të gjithë legjislacionit. Kemi planifikuar edhe ndarjen e buxhetit dhe gjithçka tjetër, në mënyrë që ky proces të fillojë” – ka shtuar Nagavci.
Ajo u sfidua se çka bëhet me gjeneratat e humbura që lihen në duart e mësuesve që nuk po arrijnë ta kalojnë testin. Lidhur me këtë, Nagavci tha se mësimdhënësit që nuk u treguan të suksesshëm në provimin për licencë të avancuar po vazhdojnë punën dhe do e kenë mundësinë të testohen prap.
“Ata që nuk kanë arrit pragun e kalueshmërisë, të cilin e kemi bërë mjaft të lartë, kanë obligim që t’i nënshtrohen përsëri testit përpara se të vazhdohet tutje. Ndërkaq, për të tjerët fillon. Me legjislacion e kemi parapa që aplikimi në këtë fazë është vullnetar. Janë përcaktu fushat e vlerësimit që nuk janë vetëm aspekti profesional. Pra, gjuha shqipe ose matematika, por është edhe aspekti pedagogjik, didaktik, është metodologjia dhe janë çështjet etike dhe çështjet e legjislacionit” – ka thënë Nagavci.
E para e Arsimit në Kosovë nuk mendon se në provimin për licencë të avancuar kanë aplikuar mësimdhënësit më të mirë dhe nuk është habitur me suksesin e arritur nga kandidatët.
“Jo nuk më ka çudit [rezultati], nuk ka qenë diçka e papritur sepse unë e di që ka mësimdhënës shumë të mirë të cilët nuk kanë apliku në herën e parë. Kanë dasht me pa pak si po shkon procesi përpara se të vazhdojnë tutje. Më konfirmon ato që kanë qenë pak a shumë të ditura, për çështjet e fakulteteve të Edukimit për shembull, për mënyrën e rekrutimit të stafit” – tha Nagavci.
Ka shumë mësues që po punësohen tash nga fillimi dhe asnjëri nuk po futet në licencim por po e merr kontratën pa u licencuar andaj Nagavci u pyet se pse nuk po e praktikojnë fillimisht licencimin e mësimdhënësve, pastaj punësimin e tyre në shkolla.
“Kontratat janë njëvjeçare dhe për licensim duhet të merret parasysh edhe puna që mësimdhënësit e bëjnë në klasë me nxënësit e tyre… Gjatë këtij një viti, vlerësohet puna e mësimdhënësit, pra shihet puna që e bën në klasë. Nëse komuna, mbikëqyrësit e vet vlerësojnë që nuk ka arrit pritshmëritë sipas detyrave dhe përgjegjësive të kontratës, ekziston mundësia që të mos vazhdohet kontrata” – u arsyetua Nagavci.
Nagavci kishte njoftuar fillimisht në konferencën për media të datës 30.12.2024 se provimit për licencë të avancuar i janë nënshtruar 54 mësimdhënës, prej tyre 7 kanë arritur pragun e kalueshmërisë.
Kurse, në njoftimin e saj në Facebook më 03.01.2025 ajo e kishte quajtur “sukses të jashtëzakonshëm” licencimin e 7 mësimdhënësve.
“Për herë të parë javën e kaluar e përmbyllëm me sukses provimin për Licencën e avancuar, të cilit iu nënshtruan gjithsej 54 kandidatë. Ky është një sukses i jashtëzakonshëm në fushën e arsimit. Qëllimi i Sistemit të Licencimit është zhvillimi i vazhdueshëm profesional dhe avancimi në karrierë i mësimdhënësve përmes vlerësimit të performancës së tyre.” – ka shkruar Nagavci në Facebook, më 03.01.2025.
Nagavci kishte thënë në Konferencën e datës 30.12.2024 se kanë aplikuar më shumë se 100 mësimdhënës, për t’iu nënshtruar provimit për Licencë të Avancuar në Mësimdhënie më 27.12.2024, kur është mbajtur ky provim.
E për mënyrën e aplikimit, ajo ka thënë se e kanë zhvilluar në formën online përmes platformës e-Kosova dhe se koha për aplikim deri në marrje të Licencës është shkurtuar nga 2-3 muaj në 2-3 ditë, nga momenti kur mësimdhënësi aplikon.
